Ómirzaq Shókeev karantın kezindegi qurylys jumystaryn aralap kórdi
TÚRKІSTAN. QazAqparat – Túrkistan qalasynda salynyp jatqan qurylys nysandary bekitilgen merziminde aıaqtalady. Bul týraly shahardaǵy birqatar qurylys nysandaryn aralap, jumystyń karantındik rejımge saı júrýin baqylap shyqqan oblys ákimi Ómirzaq Shókeev málimdedi, dep habarlaıdy QazAqparat tilshisi.
Óńir basshynyń aıtýynsha, oblys ortalyǵyn abattandyrý jumystary kestege saı júrgizilýde. Qurylysshylardyń jumys oryndaryna kelip-ketýine jaǵdaı jasalǵan. Tosqaýyl joq. Tek qurylysshylar jumys barysynda tıisti barlyq saqtyq sharalaryn qatań ustanýy tıis. Sonymen qatar, barlyǵy kúndelikti medıtsınalyq tekserýden ótip, qajet bolǵan jaǵdaıda qurylys kompanııalary qosymsha jumys kúshin tarta alady.
«Túrkistan oblysynda engizilgen karantındik rejım qurylys jumystaryna kedergi keltirmeıdi. Eldegi bolyp jatqan ahýalǵa qaramastan, qala aýmaǵyndaǵy birde-bir nysandaǵy jumys toqtatylmaıdy. Qaýipsizdik sharasyn da qatań eskeremiz. Adamnyń saýlyǵy birinshi kezekte. Jumys kúshimen tolyq qamtamasyz etip, jumystan bosaǵan azamattardy tabys kózimen qamtý úshin qalalyq ákimdik Nur-Sultan, Almatydaǵy qurylystardan bosaǵan mamandardy jumysqa shaqyra alady. Olardyń óńirimizge tosqaýylsyz jetýin qamtamasyz etýge kómek beremiz»,-dedi oblys ákimi.
Aıta keteıik, oblysta 19 sáýirden bastap karantın rejımi engizilgen. Azamattardyń ómiri men densaýlyǵyn qorǵap, halyq arasynda koronavırýstyq ınfektsııanyń keńinen taralýynyń aldyn alý maqsatynda qatań shekteýler qoıylǵan.
Halyqqa qajetti azyq-túlik zattar men ónerkásip, qurylys nysandaryndaǵy jáne kóktemgi egis jumystaryna qajet óndiristik taýarlar men materıaldar, medıtsınalyq zattar tasýǵa ruqsat qaǵazy bar avtokólikter men azamattar jáne medıtsınalyq kómek qajet bolǵan azamattar ǵana oblys aýmaǵyna kirip-shyǵa alady.
Degenmen engizilgen shekteýlerge qaramastan aımaqta qurylys salasy, kóktemgi egis naýqany, jumyspen qamtý jol kartasy, tirshilikti qamtamasyz etý nysandary karantın rejımine qaramastan jumysyn toqtatpaıdy.
Túrkistan qalasyndaǵy 35 qurylys nysanynda 4 myńǵa jýyq qurylysshy bir aýysymda jumys isteýde.
