Ómirzaq Shókeev ıtalııalyq ınvestorlarmen kezdesti

TÚRKІSTAN. QazAqparat - Túrkistan oblysy sheteldik ınvestorlardy kóptep tartýdy kózdep otyr. Oblys ákimi Ómirzaq Shókeev ıtalııalyq ENI halyqaralyq energetıkalyq korporatsııasynyń enshiles kompanııasy «ArmWind» basshylarymen kezdesti, dep habarlaıdy QazAqparat oblys ákiminiń baspasóz qyzmetine silteme jasap. .

Ekijaqty kezdesý barysynda Otyrar aýdanynda qýaty 50 MVt quraıtyn kúnnen qýat alatyn elektr stansasynyń qurylysy talqylandy.

Sheteldik ınvestorlardyń aıtýynsha, kelesi jyly bastalatyn jobanyń qurylysy 2021 jyly tolyq aıaqtalady dep josparlanýda. Óz kezeginde oblys ákimi ońtústik óńiriniń aýa-raıy jel men kún elektr qýatyn óndirýge óte qolaıly ekenin atap ótti. Sonymen qatar, eki el arasynda tıimdi birneshe áleýmettik jobalar men birlese jumys isteýdi usyndy.

«Italııa – Qazaqstannyń senimdi seriktesteriniń biri. Memleketterimiz arasynda avtokólik, qurylys, aýyl sharýashylyǵy salasynda tabysty da tıimdi qarym-qatynastardyń joǵary deńgeıine qol jetkizilgeni belgili. Túrkistan oblysynyń da kózdegen basym baǵyttarynyń biri – «jasyl ekonomıka» salasy. Onyń ústine óńirimizde ınvestorlar úshin qolaıly jaǵdaılar jasalǵan. 2 mıllıonnan astam halqy bar óńirimizde bul joba tıimdi bolary sózsiz», – dedi Ómirzaq Shókeev.

Qazaqstanda «ENI» korporatsııasynyń «ArmWind» enshiles kompanııasy elimizde jumys istegen eki jyldyń ishinde jalpy qýattylyǵy 150 MVt bolatyn iri úsh jobany tabysty júzege asyrýda. Búgingi tańda kompanııa jasyl tehnologııalardy qoldana otyryp jańa jobalardy júzege asyrý arqyly Qazaqstan ekonomıkasyn dekarbonızatsııalaýǵa sátti úles qosýda.

Aıta keteıik, 1992 jyldan bastap ENI Qazaqstanǵa 15 mlrd AQSh dollardan astam ınvestıtsııa salǵan.