Ómirzaq Shókeev iri sharýashylyqtyń jan-jaǵyna shaǵyn kásipti shoǵyrlandyrýdy tapsyrdy

AQTÓBE. QazAqparat - Aqtóbedegi sút jáne sút ónimderin óndiretin ferma qýattylyǵyn arttyrady. Búgin «Aıs» JShS jumysymen tanysqan QR Aýyl sharýashylyǵy mınıstri Ómirzaq Shókeev iri sharýashylyqtardyń aınalasynda shaǵyn kásipkerlikti damytýdy tapsyrdy, dep habarlaıdy QazAqparat tilshisi.  

Aqtóbedegi sút fermasy qýattylyǵyn arttyrady. Taǵy bir qora salynyp, 240 bas iri qara baǵylady. Bul sút óndirisin 500 tonnaǵa arttyrýǵa múmkindik beretin joba. Buryn sút zaýytyna 7 500 tonna ónim tapsyrylǵan bolatyn.

«2011 jyly 900 sıyr satyp alyndy. Sıyr Majarstan men Germanııadan ákelindi. Qazir fermada turǵan iri qaranyń bári Aqtóbede ósken, óz jerimizdiń tuqymy. Barlyǵy 860 bas iri qara bar. Onyń 720-sy saýyndy. Ótken jyly ár sıyrdan 8 800 keli sút alyndy. Sút óz zaýytymyzda óńdelip, daıyn ónim Batys Qazaqstan, Qyzylorda, Atyraý oblystaryna jetkizilip jatyr. Bir bóligi Reseıdiń Orynbor oblysyna tasymaldanady», - dedi kompanııa quryltaıshysy Marat Iteǵulov.

«Aıs» JShS-nyń aýmaǵyndaǵy asyl tuqymdy sıyrlarǵa arnalǵan jem-shóptiń bári arnaıy daıyndalady. Sıyrlarǵa untatylǵan júgeri de beriledi. Al jyl saıyn asyl tuqymdy iri qaranyń 150-200-i satylady. Kóbine Ońtústik Qazaqstan satyp alady, ishinara Batys Qazaqstan oblysynyń tutynýshylary da suranys beredi.

«Ózge mal sharýashylyqtarynan suraǵanda mal azyǵyn jeke adamdar daıyndaıdy dep aıtady. Ońtústikte bul týraly másele bolǵan emes. Aqsha tóleseńiz, olar mal azyǵyn ákelip beredi. Ónimniń ózindiń qunyna áser etedi degen nusqany zerttep kórý kerek»,- dedi Aýyl sharýashylyǵy mınıstri Ómirzaq Shókeev. Keıin iri aýyl sharýashylyǵy qurylymdarynyń jan-jaǵyna shaǵyn sharýashyqtardy shoǵyrlandyrýdy tapsyrdy. Qazirgi kezde «Aıs» JShS janynda 40 shaǵyn kásipker bar.

«Bizde 250 bas sıyr bar. Sútti «Aıs» kompanııasyna tapsyramyz. Ótken jyly sýarmaly ádispen júgeri ósirip, ony da osy fermaǵa tapsyrdyq. Ótken jyly 100 gektarǵa egildi, bıyl 1 myń gektarǵa jetkizemiz»,- dedi «RarAgro» JShS-niń basshysy Murat Selenov.

Aýyl sharýashylyǵy mınıstri Ómirzaq Shókeev tehnıka, tuqymmen kómektesý týraly surap, ferma jumysyn ári qaraı keńeıtýdi tapsyrdy. Aıta keteıik, bul kompanııa Hromtaý aýdanynan «Milker» JShS ashyp, 1 780 gektarǵa mal azyǵyn egýdi josparlap otyr. Joba quny - 2,5 mlrd teńge. Al jobanyń ekinshi kezeńinde taýarly sút fermasy salynady. 2020-2022 jyldarǵa arnalǵan joba quny - 6 mıllıard teńge. Munda jylyna 11 myńnan astam sút óndiriledi.