Ómirzaq Shókeev indetten kóz jumǵan jandardyń otbasylaryna kóńil aıtty
TÚRKІSTAN. QazAqparat – Búgin Túrkistan oblysynda ótken Aza tutý sharasyna qatysqan óńir basshysy Ómirzaq Shókeev koronavırýs ınfektsııasynan qaıtys bolǵandardyń otbasylaryna kóńil aıtty. Aımaq basshysy óz sózinde óńirdegi Covid-19 indetiniń aldyn alý, saqtaný, shekteý jáne naýqastardy emdeý sharalary qolǵa alynǵanyn atap ótti, dep habarlaıdy QazAqparat tilshisi.
Ómirzaq Shókeev naýqastardy emdeý, saýyqtyrý mekemelerinde tósek-oryndar men dári-dármek qory jetkilikti ekenin jetkizdi. Oblys turǵyndaryn qoǵamdyq oryndarda áleýmettik araqashyqtyqty saqtap, shekteý sharalaryn meılinshe ustanýǵa shaqyrdy.
« Qurmetti túrkistandyqtar! Qadirmendi jerlester! 2020 jylǵy 13 shildeni el Prezıdenti Qasym-Jomart Toqaev koronavırýstyq ınfektsııadan qaza tapqandardy eske alý – Ulttyq aza tutý kúni dep jarııalady. Bıylǵy jylǵy koronavırýstyq ınfektsııa álem boıynsha alapat shyǵyn ákeldi. Atalǵan derttiń salqyny elimizdi de aınalyp ótken joq. Sońǵy eki-úsh aıda qanshama otandastarymyz ben jerlesterimiz osy dertten kóz jumyp, qabyrǵamyzdy qaıystyryp ketti. Bizdiń memleketimiz úshin árbir adamnyń ómiri qymbat. Desek te, aty jaman indetten qanshama otbasy qara jamylyp, ul-qyzdary, týǵan-týystary qaıǵy-qasiretke dýshar boldy. Osy rette mezgilsiz dúnıeden ótken marqumdardyń týǵan-týystary men jaqyndaryna qaıǵylaryna ortaqtasyp, kóńil aıtamyn. Qazaqta «Tas túsken jerine - aýyr» degen sóz bar, endeshe bekem bolyńyzdar! Men Sizderdiń qaıǵylaryńyzǵa ortaqpyn», - dedi Ómirzaq Estaıuly.
