Ómirzaq Shókeev fermelerge tehnıkany tıimdi jolmen berý joldaryn atady
ASTANA. QazAqparat - Búgin Májilistegi Úkimet saǵatynda QR Premer-Mınıstriniń orynbasary-Aýyl sharýashylyǵy mınıstri Ómirzaq Shókeev fermerlerdi tehnıkamen qamtamasyz etýdiń jańa tetikterin aıtty, dep habarlaıdy QazAqparat tilshisi.
Atap aıtqanda, Ó. Shókeev 2017-2021 jyldarǵa arnalǵan AÓK-ni damytý baǵdarlamasyna túzetýler engizý taqyrybynda baıandama jasady. Bul oraıda birneshe salalyq baǵdarlamalardy qamtý kózdelip otyr.
«Kelesi mindet - salany tehnıkalyq jaǵynan kúsheıtý. Bul rette lızıng boıynsha paıyzdyq stavkany sýbsıdııalaý jáne ınvestıtsııalyq sýbsıdııalaý arqyly iske asady. Qazir sharýalar lızıngti 16-18 paıyzben alatyn bolsa, bul 7-8 paıyzǵa deıin tómendetiledi. Sondyqtan osyndaı qoldaýdy birtindep kóbeıtip, 2022 jylǵa qaraı kásipkerlerdiń tehnıkaǵa salatyn ınvestıtsııasyn 273 mlrd teńgege deıin jetkizýdi kózdep otyrmyz. Osy sharalardyń arqasynda aýyl sharýashylyǵy tehnıkasynyń parki 5 jylda laıyqty deńgeıge jetedi. Bul keıin tehnıkanyń jyl saıyn 6 paıyzyn jańartyp otyrýǵa múmkindik týǵyzady. Bıyldan bastap ınvestıtsııalyq sýbsıdııalaý 25 paıyzdy quraıdy», - dedi mınıstr.
Budan bólek Shókeev salaǵa naqty eginshilik elementteri (egistikterdiń elektrondy kartalary, naqty meteoderekter, sensorlar men datchıkter, ǵarysh monıtorıngi) engiziletindigin jetkizdi. Sondaı-aq ǵylymı-zertteý ınstıtýttary men tájirıbelik sharýashylyqtar bazasynda osy tehnologııalardy kóbeıtý jáne oqytý uıymdastyrylatyn bolady.
Budan buryn habarlanǵandaı, Ómirzaq Shókeev fermelerdiń tuqym alýǵa jumsaǵan shyǵystary óteletinin málim etti.
