Ómirzaq Shókeev esep berý jıynynan soń azamattardy qabyldady
TÚRKІSTAN. QazAqparat – Túrkistan oblysynyń ákimi Ómirzaq Shókeev eseptik kezdesýinen soń, jeke qabyldaýyna jazylǵan azamattardy qabyldady. Onlaın formatynda ótken qabyldaýda óńir turǵyndarynyń ótinishteri san alýan boldy, dep habarlaıdy QazAqparat tilshisi.
Aımaq basshysyna kelgen turǵyndar san túrli máseleler kóterdi. Túrkistandyqtar áleýmettik kómek, turǵyn úı, jol júrgizý boıynsha ótinishterin aıtyp, kómek surady. Azamattardyń basym bóliginiń ótinishi qabyldaý barysynda sheshimin taýyp, jaýapty tulǵalarǵa júkteldi. Qalǵan aryzdar boıynsha zańdarǵa sáıkes, túsinikteme men keńes berildi. Barlyq ótinishter oblys basshysynyń jeke baqylaýynda. Onlaın qabyldaýda bolǵan Sozaq aýdany, Sholaqqorǵan aýylynyń turǵyny sharýa qojalyqtaryna egin-sý jetispeýshiligi máselesin jetkizdi. Aýyldaǵy 1 500 ga jerge sý jetkizý maqsatynda osydan 7 jyl buryn «Biresek» sý qoımasy salynǵan. Sol kezde qurylys jumystary durys júrgizilmeýinen, paıdalanýǵa berilmegen bolyp shyqty. Sý qoımasyn qaıta qalpyna keltirý boıynsha oblystyq bıýdjetten qarjy qarastyrý máselesi qaralýda.
Oblys ákiminiń qabyldaýyna jazylǵan Báıdibek aýdany, Shaıan aýylynyń turǵyny múgedek aǵasyna estý apparatyn alyp berýdi surap, úıine gaz qubyryn kirgizýge kómek berýin ótindi. Ótinish sheshimin tapty. Al, jylytý qazandyǵyn alyp berý úshin kásipkerler qolushyn beretin boldy.
Áleýmettik jaǵynan osal toptar sanatynda, tolyq emes otbasy retinde turǵyn úı kezeginde 2019 jyly tirkelgen Túrkistan qalasynyń turǵyny oblys ákiminiń qabyldaýynda boldy. Qoldanystaǵy zańǵa sáıkes, ótinish aıtýshynynyń máselesi tek kezek retimen sheshimin tabatyny túsindirildi. Ómirlik qıyn jaǵdaıǵa tap bolǵan otbasylarǵa óńirlik «Halyq berekesi» jobasy engizilmek. Joba aıasynda turǵyn úıleri joq otbasylarǵa 3 jylǵa tegin baspana usynylatyn bolady. Al, Kentaý qalasy, Shaǵa aýyldyq okrýginiń turǵyny sýarmaly jáne jaıylymdyq jerlerdi keńeıtý týraly ótinishin aıtty. Osyǵan deıin 25 shq. 5 kanal kúrdeli jóndeýden ótken. Jer kóleminiń ulǵaıýynan sý arnasyn uzartý josparlanýda. Arnaıy jer qorynda 16 329 ga aýyl sharýashylyǵy maqsatyndagy jaıylymdy alqaptar anyqtalyp, bul alqaptardy ortaq jaıylym úshin paıdalaný maqsatynda rásimdeý jumystary júrgizilýde. Másele oń sheshimin tabatyn boldy.
Onlaın qabyldaýynda Ómirzaq Estaıuly barlyq ótinishterge zań aıasynda tolyqqandy jaýap berdi. Eldegi pandemııaǵa baılanysty jeke qabyldaýlar men jıyndar onlaın formatyna kóshkeni belgili. Turǵyndardy qabyldaý – halyqpen baılanysty tıimdi uıymdastyryp, turǵyndar máselesiniń sheshilýine sep bolary sózsiz.
