Ómirzaq Shókeev birqatar sheneýniktiń jumysyn synap, sógis jarııalady
«Nurly jer» memlekettik baǵdarlamasy boıynsha jergilikti qamtý úlesi, ıaǵnı oblystyń qurylys alańdarynyń otandyq taýarlarmen qamtylýy 64%-dy quraǵan. Oblys basshysy Ómirzaq Shókeev baqylaý, qadaǵalaý jumystarynyń tıisti deńgeıde júrgizilmegeni úshin oblystyq qurylys basqarmasynyń basshysy Toqtar Úsipálıevke sógis jarııalady.
Buǵan deıin Memleket basshysy jaıylym máselesine toqtalyp, retke keltirýdi tapsyrǵan bolatyn. Apparat otyrysynda aýyl turǵyndaryna qoljetimdi bolýy tıis jerlerdiń tapshylyǵy Túrkistan oblysynda da tirkelgeni aıtyldy.
Oblys ákimi paıdalanylmaıtyn jaıylymdyq jerlerdi memleket menshigine qaıtarý jumystary aýdan, qala ákimdikterinde uzaqqa sozylyp, tıisti deńgeıde júrgizilmeıtinin aıtty.
Oblys ákimi oblystyq basqarma basshysy men aýdan, qala ákimderine eki apta ýaqyt berdi. Paıdalanylmaı jatqan jaıylym jerlerdi memlekettik menshikke qaıtarýdyń qadamdyq algorıtmin ázirlep, usynýdy tapsyrdy. Aımaq basshysy aýyl sharýashylyǵy jerlerine ǵaryshtyq monıtorıng júıesin negizgi tetik retinde qarastyrý kerektigin aıtty.
Sondaı-aq, Ómirzaq Estaıuly bos jatqan jerlerdi memleket menshigine qaıtarýdy jyl sońyna deıin tolyq oryndaýdy tapsyrdy. Jınalysta Túrkistan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva turǵyndardy jumyspen qamtý boıynsha sońǵy aqparattardy ortaǵa saldy. Úkimet otyrysynda memlekettik baǵdarlamalar arqyly jumysqa ornalasqan keı azamattardyń mindetti zeınetaqy jarnalary aýdarylmaǵany aıtylǵan bolatyn. Bul oraıda oblys ákimi basqarma basshysyna oblystyq kiris departamentimen birlesip, tekserý júrgizýdi mindettedi.
Tekserý qorytyndysy bir apta ishinde daıyn bolýy tıis. Olaı bolmaǵan jaǵdaıda, jaýapty mamandarǵa tıisti sharalar qoldanylatyn bolady. Apparat otyrysynda kórsetkishteri tómen Túrkistan men Kentaý qalalyq ákimdiktiń áleýmettik bólim jetekshilerine tártiptik shara qarastyryldy.