Ómirzaq Shókeev: Bıdaı ótkizetin dástúrli naryqtarymyz úshin kúresemiz
ASTANA. QazAqparat - Qazaqstan bıdaıyn ótkizip júrgen dástúrli naryqtarda báseke kúsheıip keledi. Búgin Májilistegi Úkimet saǵatynda QR Premer-Mınıstriniń orynbasary-Aýyl sharýashylyǵy mınıstri Ómirzaq Shókeev osylaı málim etti, dep habarlaıdy QazAqparat tilshisi.
Atap aıtqanda, Ó. Shókeev 2017-2021 jyldarǵa arnalǵan AÓK-ni damytý baǵdarlamasyna túzetýler engizý taqyrybynda baıandama jasady. Bul oraıda birneshe salalyq baǵdarlamalar qamtylmaq.
«Ósimdik sharýashylyǵyna keletin bolsaq, eńbek ónimdiligin arttyrý úshin biz eń aldymen suranys jaǵyn saraptaýymyz qajet. Bıdaı men unnyń óndirisi qazir tolyǵymen eksportqa baılanysty bolyp tur. Bizdiń qalyptasqan dástúrli naryqtarymyzda báseke kúsheıip bara jatyr. Tranzıttik elder tarapynan protetsıonıstik, ıaǵnı ishki naryqty qorǵaý áreketterin baıqaımyz. Árıne, dástúrli naryqtarymyz úshin kúresti jalǵastyramyz», - dedi vedomstvo basshysy.
Sonymen qatar jańa naryqtardy keńeıtý qajettigine toqtalǵan mınıstr, byltyr Qytaıǵa kvotamen 150 myń tonna bıdaı jóneltilse, bıyl kvotadan tys 200 myń tonna eksporttalǵanyn atap ótti. Mınıstrlik maqsaty - aldaǵy jyldary bul kólemdi 1 mln tonnaǵa jetkizý.
«Iranǵa sońǵy jyldary bıdaı múldem eksporttalmaǵan. Qazir Eýrazııalyq ekonomıkalyq odaq aıasynda bul másele qyzý talqylanyp jatyr. Meniń oıymsha, jaqyn arada Iranǵa eksporttalatyn bolady», - dedi Ómirzaq Shókeev.
Budan buryn habarlanǵandaı, Ómirzaq Shókeev fermerlerdiń tuqym alýǵa jumsaǵan shyǵystary óteletinin málim etti.
Sonymen qatar ol fermelerge tehnıkany tıimdi jolmen berý joldaryn atady.
