Ómirzaq Shókeev áıelder qaýymyn merekemen quttyqtady
TÚRKІSTAN. QazAqparat - Búgin Túrkistan oblysynyń ákimi Ómirzaq Shókeev 8 Naýryz merekesi qarsańynda áıelder qaýymyn quttyqtady, dep habarlaıdy QazAqparat óńir ákimdigine silteme jasap.
Arnaıy uıymdastyrylǵan saltanatty sharaǵa tyl eńbekkerleri, kópbalaly analar men túrli salada eńbek etip júrgen názik jandylar tórden oryn aldy. Oblys basshysy óńir damýyna ólsheýsiz úlesterin kosyp kele jatqan analarymyzǵa óz alǵysyn bildirdi.
«Sizderdi kóktemniń shýaqty merekesi Halyqaralyq áıelder kúnimen shyn júrekten quttyqtaımyn. Batyr da, aqyn da, alyp ta anadan týady. Sondyqtan jer betinde ana týraly tebirenbegen adam, ana týraly jyr jazbaǵan aqyn joq. Qazaqta «Ana alaqanynyń aıasy, Aq shynardyń saıasy» degen maqal bar. Árbir perzenttiń paryzy - aldymen ana sútin aqtaý, ardaqty anaǵa qurmet kórsetý. Kezinde zańǵar jazýshymyz Ǵabıt Músirepov «Áıel ashýlansa jeńiledi, erkelese jeńedi» degen eken. Álemdi, jerdi jaryq etip otyratyn eki nárse bar. Bireýi - Kún, ekinshisi - áıel. El aýzyndaǵy osy qanatty sóz búgingi merekeniń ajaryn ashyp turǵandaı. Eger ár otbasyda ana baqytty bolsa, onda tutas el baqytty bolady! Búgingi jyly sózder de, qurmet te tek Sizderge arnalady. Barsha aq jaýlyqty analarymyz ben qyz-kelinshekterdiń otbasyna amandyq, jumystaryna bereke tileımin. Júzderińizden kúlki, júrekterińizden mahabbat, kóńilderińizden shattyq pen qýanysh ketpesin! Merekelerińiz qutty bolsyn!», - dedi oblys ákimi Ómirzaq Shókeev. 
Tarıhymyzda bir otbasyǵa ǵana emes, tutas elge úlgi-ónege kórsetken ardaqty analarymyz ben batyr arýlarymyz bolǵan. Danalyqtyń belgisindeı Domalaq ana, uly Abaıdy tárbıelegen Zere áje bizdiń el úshin áje tárbıesiniń, ana meıiriminiń orny erekshe ekenin ańǵartqandaı. Búginde aq jaýlyqty analarymyz, namysty arýlarymyz qoǵamnyń san túrli salasynda elge adal qyzmet etip júr. Otbasynyń ǵana emes, Túrkistan oblysynyń órkendeýine úles qosyp keledi. Atap aıtsaq, bilim, mádenıet, medıtsına, jergilikti basqarý, kásipkerlik, aýyl sharýashylyǵy, sport jáne ózge de salalarda ozat eńbegimen kózge túsip júrgen qyz-kelinshekter jeterlik.
8 Naýryz - Halyqaralyq áıelder kúnine oraı uıymdastyrylǵan saltanatty shara sońy kontserttik baǵdarlamaǵa ulasty.
