Ómirzaq Shókeev: Aýyl sharýashylyǵy salasynda tek tıimdi sýbsıdııalar qalady
ASTANA. QazAqparat - Aýyl sharýashylyǵy salasyndaǵy nesıeniń paıyzdyq mólsherlemesi tómendetiledi. Bul týraly Parlament Senatynyń jalpy otyrysynda «2018-2020 jyldarǵa arnalǵan respýblıkalyq bıýdjet týraly» zań jobasyn talqylaý barysynda QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev málim etti, dep habarlaıdy QazAqparat tilshisi.
«Bizde aýyl sharýashylyǵyn sýbsıdııalaý júıesi óte kúrdelenip ketkenin ózderińiz bilesizder. Qazir 54 sýbsıdııanyń túri bar. Negizgi baǵytymyz bul sýbsıdııalardy jeńildetýge arnalǵan. Bıyldyń ózinde 42 sýbsıdııany qaldyrmaqpyz, onyń ishinde tıimsizderin qysqartyp, tıimdi joldaryn izdeımiz. Birinshiden, nesıe alatyndarǵa onyń paıyzyn tómendetý máselesine kóbirek kóńil bólemiz. Odan keıin ınvestıtsııalyq sýbsıdııalardy kóbeıtemiz», - dedi Shókeev.
Osy oraıda mal sharýashylyǵy salasyna toqtalǵan ol, et pen sút óndirý baǵyttaryna erekshe ekpin qoıylatynyn atap ótti. Sonymen qatar sýarmaly jerlerdi keńeıtip, bul egisterdi tıimdi paıdalanýǵa da bysymdyq beriledi.
«Sýbsıdııa týraly barlyq ózgeristerdi Aýyl sharýashylyǵy mınıstrliginiń saıtyna eki aı buryn ornalastyrǵanbyz. Sodan beri kásipkerlermen, ákimdermen jáne basqa da múddeli organdarmen tyǵyz jumystardy atqaryp jatyrmyz. Jaqyn arada osy másele boıynsha baspasóz máslıhatyn ótkizemiz», - dedi Ómirzaq Shókeev.
