Ómirzaq Shókeev aýdan ákimine tapsyrma berdi
TÚRKІSTAN. QazAqparat - Túrkistan oblysynyń ákimi Ómirzaq Shókeev Saryaǵash aýdanyna arnaıy jumys saparmen baryp, birqatar aýyl sharýashylyǵy nysandaryndaǵy atqarylyp jatqan jumystarmen tanysty, dep habarlaıdy QazAqparat tilshisi.
Óńir basshysy aldymen Qurkeles aýyldyq okrýginde ornalasqan «Abdraman» sharýa qojalyǵyn aralap kórdi. Sharýashylyqtyń jumysymen tanysqan oblys ákimi aýdanda jylyjaılarda qulpynaı sharýashylyǵyn damytý boıynsha semınarlar uıymdastyrý kerektigin atap ótti. Oǵan jergilikti ákimdik tarapynan tıisti sharalardy qolǵa alýdy tapsyrdy. Munan soń Ómirzaq Shókeev Darbaza aýyldyq okrýginde ornalasqan asyl tuqymdy mal sharýashylyǵy jáne sút óndirýmen aınalysatyn «Fırma Saken» jaýapkershiligi shekteýli seriktestigine aıaldady.
Búginde atalǵan qojalyqtyń menshiginde 1600-ge jýyq gektar jeri bar jáne mekeme jylyna 720 tonna sút óndirýge qaýqarly. Ozyq zamanaýı tehnologııamen jumys isteıtin seriktestiktiń ıeliginde 600-ge jýyq iri qara maly, 2 myńnan astam ýaq mal bar. Sondaı-aq, aımaq basshysy «Qaplanbek» aýyldyq okrýginde ornalasqan «Jabaıy ata» sharýa qojalyǵynyń da jumys barysymen tanysty. 1,8 mlrd. teńge bolatyn joba 2009 jyly júzege asyrylǵan. Qojalyq jylyna 4 200 tonna ónim óndirip, Nur-Sultan, Almaty qalalaryna jáne Soltústik oblystarǵa, Reseıge jóneltip keledi. Sonymen qatar, oblys basshysy Qaplanbek oqý tájirıbe sharýashylyǵy aýmaǵynan boı kóterip jatqan kópqabatty turǵyn úılerdiń qurylys jumystarymen tanysty. Munda 5 qabatty 45 páterli 13 turǵyn úı salynyp jatyr. Ótken jyly bastaý alǵan qurylys bıyl aıaqtalyp paıdalanýǵa beriledi dep josparlanýda. Aýdannyń birqatar nysandaryn aralap shyqqan oblys ákimi jergilikti bılik ókilderine birqatar tapsyrmalar júktedi. Sonyń biri aýdan aýmaǵyndaǵy tazalalanǵan sý arnalaryna tıisti taldaýlar jasap, tazalaý nátıjesinde shyqqan qoqystardy shyǵaryp tastaý boldy.
Sondaı-aq, óńir basshysy aýdan aýmaǵynan aǵyp ótetin «Keles» ózeniniń boıyndaǵy apatty jerlerdi anyqtaýdy mindettedi. Ózen arnasyn tiktep, nyǵaıtý jumystaryn uıymdastyrýdy qamtamasyz etý kerek ekenin aıtty. Odan bólek, aýdany aýmaǵyndaǵy Respýblıkalyq, oblystyq mańyzy bar avtomobıl joldaryna taldaý jasap, respýblıkalyq, oblystyq avtojoldaryna jóndeý jumystary júrgizýdi de júktedi.
Eń bastysy, aýdanda jańadan salynyp jatqan kópqabatty úılerdiń ınfraqurylym máselesin tezdetip sheshý kerektigin atap ótti.
