Ómirzaq Shókeev aýdan ákimderine halyqty baspanamen qamtamasyz etýdiń joldaryn qarastyrýdy tapsyrdy
TÚRKІSTAN. QazAqparat – Túrkistan oblysynyń ákimi Ómirzaq Shókeev Maqtaaral, Jetisaı jáne Keles aýdandarynyń ákimderin qabyldap, olardyń jyl boıy atqarǵan jumystarymen tanysty. Aımaq basshysymen kezdesýde aýdan ákimderi sheshimin kútken máseleleri men usynystaryn ortaǵa saldy, dep habarlaıdy QazAqparat tilshisi.
Óńir basshysy halyqtyń ómir súrý sapasyn arttyrý men eldi mekenderge jol salý, gaz tartý jáne elektr jaryǵy,aýyzsýmen qamtý boıynsha birqatar naqty tapsyrmalar berdi. Sondaı-aq, halyqty baspanamen qamtamasyz etýdi júktedi. Ol úshin bankter tarapynan usynylatyn sharttardy zerdelep, jan-jaqty jolyn qarastyrýdy tapsyrdy.
Sondaı-aq aımaq basshysy Maqtaaral, Jetisaı jáne Keles aýdandarynan kelgen turǵyndardy qabyldap, olardyń aryz-shaǵymyn tyńdady. Jeke bastaryna qatysty máselelerin kótergen turǵyndar, aýyl sharýashylyǵy salasy men kásipkerlikke jáne mektep salý men jastardyń demalatyn oryndaryn kóbeıtýge yqpal jasaýdy surady. Jetisaı aýdanynan kelgen jastar oblys ákiminiń atynan sporttyq týrnır ótkizýdi usyndy.
Kezdesý sońynda aýyl turǵyndarynyń usynys-shaǵymdaryna qatysty Ómirzaq Shókeev jaýapty sala jetekshilerine naqty tapsyrma berdi.
