Ómirzaq Shókeev «Ashyq ákimdik» alańynda turǵyndardy qabyldady
TÚRKІSTAN. QazAqparat - Túrkistanda «Ashyq ákimdik» keńsesi ashylyp, Ómirzaq Shókeev onlaın formatta Biryńǵaı qabyldaý kúnin ótkizdi, dep habarlaıdy QazAqparat óńir basshysynyń baspasóz qyzmetine silteme jasap.
Sharaǵa Túrkistan oblysy boıynsha Memlekettik qyzmet isteri departamentiniń basshysy Aıbek Shilmanov jáne oblys ákiminiń orynbasarlary men basqarma basshylary qatysty. «Ashyq ákimdiktiń» maqsaty - halyqqa qaltqysyz qyzmet etý. Memlekettik qyzmettiń ashyqtyǵyn, qoljetimdiligin kózdeıtin alań qurý. Osylaısha óńir turǵyndary aldyn ala jazylýsyz memlekettik organ ókilderimen tikeleı kezdesip, ózderiniń túıtkildi máselelerin kótere alady.
«Memleket basshysy Qasym-Jomart Toqaevtyń «Halyq únine qulaq asatyn memleket» tujyrymdamasy qalyń el tarapynan keńinen qoldaý tapty. «Ashyq ákimdik» keńsesiniń ashylýy memlekettik apparatty transformatsııalaýdaǵy, sondaı-aq jańa formatsııadaǵy memlekettik qyzmetshilerdi qalyptastyrýdaǵy jáne halyqqa qyzmet kórsetýde jaılylyqty arttyrýdaǵy mańyzdy qadam bolyp tabylady. El ıgiligi úshin ashylǵan bul keńse kóptegen máselelerdiń kúrmeýin sheshýine óz septigin tıgizetini sózsiz», - dedi oblys ákimi.
Jańa alań halyqpen ashyq pikir almasýǵa, buqaramen kezdesýge, eldiń jaǵdaıymen jaqynnan tanysý maqsatynda, jańadan boı kótergen basqarmalar úıiniń birinshi qabatynan ashyldy. Biryńǵaı keńse formaty jobasynda ótinishtermen jumys jasaıtyn 21 jáne tikeleı memlekettik qyzmet kórsetiletin 16 oblystyq basqarmalardyń mamandary qamtamasyz etilgen.
Kelýshiler úshin kútý zaly, tegin wi-fi men bankomattar jáne arnaıy e-gov portalyna qosylǵan termınaldar ornatylǵan. Sonymen qatar, munda turǵyndarmen «Ashyq dıalog» formatynda open space zaly iske qosylyp, azamattardyń jeke máseleleri boıynsha qabyldaý uıymdastyrylady.
Biryńǵaı qabyldaý kúnin ótkizgen oblys ákimi Ómirzaq Shókeev turǵyndarmen onlaın rejımde tildesti. Shaǵym – tilekterin tyńdap, jaýapty orynbasarlaryna tapsyrma berdi. Atap aıtsaq, Saıram aýdanynan ótinishpen shyqqan jergilikti turǵyn zaýyt ashý úshin jer surady. Osyǵan oraı bir ǵana Qarabulaq aýdanynda jer telimderine qatysty 1,5 myńǵa jýyq zańsyz áreketterdiń anyqtalǵany aıtyldy. Oblys basshysy zań talaptaryna sáıkes kásipker ótinishin júzege asyrýdy tapsyrdy. Sondaı-aq Maqtaaral aýdany, Jeńis aýylynyń turǵyny aýyldastary atynan alǵysyn aıtyp, el amanatyn jetkizdi. Ómirzaq Estaıuly Báıdibek, Arys, Saıram jáne Maqtaaral aýdandary turǵyndarynyń bazynasyna tıisti aýdan men qala ákimderine tikeleı baılanys arqyly tapsyrmalar júktedi.
Bekitilgen jospar-kestege sáıkes, oblys turǵyndarynyń ótinishterin barynsha azaıtý jáne sapaly jaýap berilýin arttyrý maqsatynda oblys ákimi apparaty tarapynan aýqymdy jumystar atqarylýda. Apta saıyn oblys ákiminiń orynbasarlary oblys turǵyndaryn onlaın formatynda jeke qabyldaıdy. Bul óz kezeginde jergilikti turǵyndardyń kóterilgen máselelerin bir jerden sheshimin taýyp, ótinishterin qanaǵattandyrýǵa múmkindik beredi.
Azamattardy ár aıdyń sońǵy jumasy kúni Biryńǵaı qabyldaý kúnderin uıymdastyrý maqsatynda, atalǵan keńsede arnaıy azamattardy jeke qabyldaý bólmesi jasaqtaldy. Al turǵyndar túrli máseleler boıynsha ótinish-tilekterin qaldyra alady.
