Ómirzaq Shókeev Arystaǵy qurylysty merziminde aıaqtaýdy tapsyrdy
Basqosýǵa elimizdiń barlyq oblystarynan kelgen Arys qalasyndaǵy qurylys jumystaryna jaýapty ókilderi, Túrkistan oblystyq basqarma basshylary men aýdandyq ákimdik mamandary qatysty. Jıynda Arys qalasyndaǵy turǵyn úıler, áleýmettik nysandar men joldarda júrgizilip jatqan qurylys jumystary men turǵyndarǵa kórsetilip jatqan kómektiń jaı-kúıi talqylandy. Oblys basshysy barlyq qurylys nysandarynyń der kezinde aıaqtalýyn tapsyryp, qurylys sapasyna basa nazar aýdarý kerektigin qadap aıtty. Basqosýda sóz alǵan qurylysshylar jumysqa kedergi keltirip jatqan birqatar máselelerdi sóz etti. Olardyń aıtýlarynsha, Arystaǵy birneshe úı ıeleri saraptaý qorytyndysymen kelispeı otyr. Turǵyndar úılerin kúrdeli jóndeýdiń ornyna túgel súrip tastaýdy talap etýde. Mundaı azamattarǵa aldyn ala eskertýler jasalǵan. Sondaı- aq, qujattardy zańdastyrýǵa qatysty keı qıynshylyqtar da belgilegen merzimnen keshigýge sep bolýda.
Máselege qanyqqan Ómirzaq Estaıuly barlyq sektor jaýaptylaryna qurylys jumystaryn aıaqtaý merzimin belgilengen kesteden keshiktirmeýdi jáne oryn alǵan kemshilikterdi jeke - jeke qarap, turǵyn úı ıeleriniń ótinishterin eskere otyryp sheshýdi tapsyrdy. Jıynda Túrkistan oblysy Qurylys basqarmasy basshysynyń orynbasary Erbol Ahmetov Arys qalasyndaǵy qurylys-jóndeý jumystary jaıynda baıandama jasady.
«Jalpy Arys qalasynda 8637 turǵyn úı nysany ornalasqan. Onyń ishinde: Jeke turǵyn úı - 8534; Kóp qabatty turǵyn úıler - 103. Jóndeýdi qajet etetini – 7 164 nysan. Qalpyna keltirýge jatpaıtyn - 470 nysandy quraıdy. Aǵymdaǵy jyldyń 6 qyrkúıektegi jaǵdaıǵa 7149 – turǵyn jáne kópqabatty úılerde qurylys jumystary aıaqtalyp, onyń ishinde 189 qurylystary ishki árleýsiz aıaqtalǵan. Al, qalǵan 15 nysanda qurylys jumystary júrgizilýde, onyń ishinde 10 nysan boıynsha menshik ıeleriniń kelispeýinen qurylys jumystary toqtap tur. Qalpyna keltirý jumystaryna: 144 – qurylys kompanııalary, 4 248 – jumysshylar, 215 – arnaıy tehnıkalar tartyldy», - dedi ol.
Arys qalasy boıynsha avtomobıl joldaryn jóndeý jumystaryn júrgizý 13 aımaq josparlanǵan. Búginde jalpy 62 kósheniń 37 kóshesi aıaqtaldy. Qalǵan 25 kóshesinde jumystar júrgizilýde. 16 kóshesinde aıaqjol salý jumystary aıaqtalyp, jaryqtandyrý boıynsha jumystar júrgizilýde. Al 6 kóshesinde jaryqtandyrý jumystary jalǵasýda. Joǵaryda atalǵan kósheler qyrkúıek aıynda tolyq aıaqtalatyn bolady. Jalpy búgingi kúnge Arys qalasynda 543 kommertsııalyq nysan bar. Onyń ishinde 509 nysanǵa zalal keltirilgen, al 12 nysan tolyǵymen joıylǵan. Arys qalasynda jalpy 68 áleýmettik nysan jóndeýdi qajet etedi. Onyń ishinde 4 jana qurylys, 64 qalpyna keltirý jumystary júrýde. Bilim berý nysandary – 53, densaýlyq saqtaý – 8, sport nysandary – 4, qoǵamdyq oryndar – 3, Aǵymdaǵy jyldyń 6 qyrkúıektegi jaǵdaıǵa 62 nysannyń qurylys jumystary aıaqtaldy. Qalǵan 6 nysanda qurylys jumystary júrgizilýde.
Jıynnan soń Ómirzaq Shókeev Arys qalasyndaǵy birqatar qurylys nysandaryn aralap shyǵyp, jergilikti turǵyndarmen kezdesti.
