Ómirzaq Shókeev Arystaǵy qurylys-jóndeý jumystarymen tanysty

ARYS. QazAqparat -Búgin Túrkistan oblysynyń ákimi Ómirzaq Shókeev Arys qalasyndaǵy qurylys-jóndeý jumystary júrip jatqan sektorlardyń jumysymen tanysty. Bul týraly QazAqparat ákimdiktiń baspasóz qyzmetine silteme jasap habarlaıdy.

Árbir oblysqa qarasty turǵyn úılerdi aralady. Óńir basshysy áýeli Jambyl oblysy shtabyna aıaldap, jumysshy toppen kezdesti. Oblys ákimi jóndeý jumystary boıynsha árbir shtab onlaın júıede esep berip otyrý qajettigin aıtty.

Keıin Jambyl oblysyna qarasty 3-sektordaǵy jóndeýden ótip jatqan jeke turǵyn úılerdi kórdi. Turǵyndarmen kezdesken Ómirzaq Estaıuly barlyq qurylys-jóndeý jumystary 1 aıda aıaqtalyp, qala jańa keıipke enetinin jetkizdi.

Aıta keterligi, Arys qalasynyń aýmaǵy 17 sektorǵa bólingen. Onyń ishinde, Jambyl oblysyna 11 kóshede ornalasqan 327 jeke turǵyn úıdi qalpyna keltirý jumystary júktelgen. Buden bólek, 14 áleýmettik jáne kommertsııalyq nysandar bar. Qazirgi tańda jambyldyq qurylysshylar men eriktiler óz aýmaǵyndaǵy úılerdi qalpyna keltirý jumysyna belsene kirisken. Sonyń nátıjesinde 5 jeke turǵyn úıdiń jóndeý jumystary tolyq aıaqtalyp otyr. Arys qalasyn qalpyna keltirý boıynsha jambyldyq 16 qurylys kompanııasynyń 180 qurylysshysy jumyldyrylǵan. Olar qazirgi tańda 43 turǵyn úıdiń jóndeý jumystaryn qyzý atqarýda.

Sonymen qatar, oblys ákimi Atyraý oblysyna qarasty 1-sektordyń jumysymen tanysty. Atyraýlyq aımaqqa 450 nysan qaraıdy. Batystyq 9 kompanııadan 200-ge jýyq jumysshy jóndeý jumystaryna belsene kirisken.

Ómirzaq Shókeev qurylys jumystaryn ýaqytynda sapaly etip aıaqtaýdy tapsyrdy.