Ómirzaq Shókeev: Ary taza adam ózine qara kúıeniń jaǵylýyna jol bermeıdi
Halyqaralyq jıynǵa Túrkııa, Reseı, Ózbekstan elderinen arnaıy kelgen ǵylym, zań, sot salasynyń ókilderi men elimizdegi Joǵary Sottyń, Bas prokýratýra men Іshki ister mınıstrliginiń ókilderi konferentsııa barysynda zań aıasynda dıalogtyq alań quryp, úzdik tájirıbelerimen oı bólisti.
Aımaq basshysynyń qabyldaýynda bolǵan qonaqtar atalǵan jıynnyń mańyzdylyǵyn atap ótip, oblys basshysyna alǵystaryn jetkizdi. Alǵy sóz alǵan QR Sybaılas jemqorlyqqa qarsy is-qımyl Agenttigi Tóraǵasynyń orynbasary Nurlan Shabdar óńirde júrip jatqan jemqorlyqpen kúres jumystarynyń júıeli de nátıjeli ekenin atap ótti. Túrkistan oblysynda shyǵarylatyn ónimderde «Sybaılas jemqorlyqtan taza aımaq» atty mór basylatyny jaıly bastamanyń ózektiligin erekshe eskerdi. Óz kezeginde, oblys basshysy jıynǵa qatysqan qonaqtarǵa alǵysyn bildirdi.
«Mundaı aýqymdy jıynnyń óńirimizde osymen ekinshi ret ótip jatqany qýantady. Jemqorlyq, ras, jahanǵa jaıylǵan indet. Áıtkenmen, Túrkistan sekildi kıeli óńir bul indetten eń taza aımaq bolýy tıis. Osy jolda atqarylyp jatqan júıeli jumystar jetkilikti. Ary taza adam ózine qara kúıeniń jaǵylýyna jol bermeıdi», - dedi oblys ákimi kezdesý barysynda.
Otyrysta elimizde advokat pen tergeýshi mártebesin kóterý, jemqorlyqqa qatysty halyqtyń quqyqtyq saýatyn arttyrý jumystaryn kúsheıtýdi sekildi kóptegen mańyzdy máseleler kóterildi. Sotqa deıingi is júrgizýdegi jáne quqyq qoldanýdaǵy ózekti máselelerdi jan-jaqty talqylap, halyqaralyq tájirıbelerdi zertteý, tıimdi tásilderdi ázirleý jóninde pikir almasty.
