Ómirzaq Shókeev álemdik dodalarda top jarǵan sportshylarmen kezdesti
TÚRKІSTAN. QazAqparat – Túrkistan oblysynyń ákimi Ómirzaq Shókeev álemdik jáne el ishindegi sporttyq jarystardyń jeńimpazdarymen jáne olardyń bapkerlerimen kezdesti, dep habarlaıdy QazAqparat tilshisi.
Aımaq basshysy Túrkistan oblysynyń ǵana emes, kúlli qazaq eliniń namysyn qorǵap, kók baıraǵymyzdy jelbiretip júrgen jas chempıondar, bokstan Álem chempıonatynyń qola júldegeri Sáken Bıbosynovqa, bokstan Álem chempıony Qaırat Eralıevke, jamby atýdan Álem chempıony Eralhan Aıkózge jáne sambodan bes dúrkin Azııa jeńimpazy Aıjan Jylqybaevaǵa syı-qurmet kórsetti. Sondaı-aq sportty damytýda alda úlken josparlardyń bar ekendigin atap ótti.
«Sport salasyna barynsha qoldaý kórsetemiz. Qazaq halqynyń dańqyn asqaqtatýda atqaryp júrgen tynymsyz eńbekterińizdi óz basym jaqsy bilemin, túsinemin. Jastardy jappaı sportqa baýlýdy qolǵa alý kerek. Bul maqsatta óńirde Olımpıadalyq rezervtegi mektep, stadıon, tennıs alańy men ıppodrom qurylysy qolǵa alynady. Qazaqstan sportynyń ósip-órkendeýine súbeli úlesin qosyp kele jatqan janashyr azamattardyń eńbekteri orasan», - dedi Ómirzaq Shókeev.
Óz kezeginde sport sheberleri oblys ákiminiń qoldaýyna rızashylyqtaryn bildirip, Aqtóbe qalasynda ótken ulttyq sport túrlerinen saıysynda jeńip alǵan bas júlde – Kýbokty tartý etti. Bıyl tórtjyldyqtyń basty sport dodasy – Tokıo Olımpıadasyna lıtsenzııalyq týrnırler ótetin jaýapty jyl. 2020 jyly kezekti jazǵy Olımpıada oıyndarynyń alaýy Japonııa astanasynda tutanady. Osy rette Ómirzaq Shókeev túrkistandyq sportshylarǵa sol halyqaralyq týrnırlerde sáttilik tiledi.
