Ómirzaq Shókeev: Aldymen aýyldy kórkeıtýimiz qajet
TÚRKІSTAN. QazAqparat - Búgin Túrkistan oblysynyń ákimi Ómirzaq Shókeev Qazyǵurt aýdanyna jumys saparymen bardy, dep habarlaıdy QazAqparat.
Óńir ákimdiginen málem etkendeı, oblys basshysy aldymen «Amangeldi» JShS-nyń jumysymen tanysty. Qojalyqtyń jer kólemi - 2322 gektar. Óndiretin ónim túrleri - I, II jáne III reprodýktsııaly bıdaı tuqymy men jemis-jıdek ónimderi. Onda 250 adam turaqty jumyspen qamtylǵan. Tamshylatyp sýarý ádisimen 405 gektar alqapqa jemis-jıdek egip otyr. Atap aıtqanda, 150 gektarǵa - alma, 88 ga jerge - shabdaly, 31 ga - shıe, 94 ga - alhory, 25 ga - órik, 17 ga - almurt, 120 ga - taıfyı sortyndaǵy júzim.
Qojalyq jumysymen tanysqan Ó.Shókeev ónimderdi eksporttaýdy qolǵa alý qajettigin aıtty.
Aýdandaǵy sapar «Aýyl - el besigi» jobasy sheńberinde Qazyǵurt aýdanynda iske asyrylatyn jobalarǵa arnalǵan jıynmen jalǵasty. Onda aýdan ákimi Tólegen Telǵaraev baǵdarlama aıasynda atqarylar jumystarmen tanystyrdy.
«Qazyǵurt aýdanyna «Aýyl - el besigi» jobasy sheńberinde 2019 jyly 608 mln 757 myń teńge baǵyttaý josparlanýda. Joldardy ortasha jóndeýge 343 mln 192 myń teńge, al bilim salasy boıynsha mektepterdi aǵymdaǵy jóndeýge 37 mln 915 myń teńge qarastyryldy. Sondaı-aq, joba aıasynda ortalyq fýtbol alańy, balabaqshalar, mádenıet úıi, ortalyq kitaphana aǵymdaǵy jóndeýden ótedi», - dedi aýdan ákimi.
Oblys ákimi aýdan basshylyǵyna «Aýyl - el besigi» baǵdarlamasyn qoldap, aýyldy, aımaqty kórkeıtý qajettigin tapsyrdy.
«Joba júıeli túrde iske asýy qajet. Aldymen aýdan ortalyǵy, okrýg ortalyǵy, keıin jyl saıyn 5 aýyldy kórkeıtip, abattandyrý jumystary júrgizilýi kerek. Aýyldarda nysandar kóbirek salynyp, kósheler jóndelip, saıabaqtar sany jyl saıyn artýy tıis», - dedi Ómirzaq Shókeev.
