Ómirzaq Shókeev: 2018 jyl aýyl sharýashylyǵy úshin óte berekeli boldy
ASTANA. QazAqparat - QR Premer-mınıstriniń orynbasary - Aýyl sharýashylyǵy mınıstri Ómirzaq Shókeev 2018 jyl aýyl sharýashylyǵy úshin berekeli ári tabysty jyl bolǵanyn aıtyp berdi, dep habarlaıdy QazAqparat tilshisi.
«Bıylǵy jyl aýyl sharýashylyǵy salasyna óte tabysty boldy. Kóptegen júıeli máseleler sheshildi. Eń bastysy biz Úkimetpen jáne Parlamentpen birlesip, jańa baǵdarlamalardy qabyldadyq. Jarty jyldyń ózinde birshama nátıjege qol jetkizildi. Mal sharýashylyǵynda, et óndirýde, eksportqa shyǵarýda, eńbek ónimdiligin ósirý joldaryn tsıfrlandyrýda kóptegen sharýa atqaryldy», - dedi Ómirzaq Shókeev Úkimet otyrysynan keıin tilshilerdiń suraǵyna jaýap bere otyryp.
Ómirzaq Shókeev óz sózin naqty kórsetkishtermen shegeleı tústi.
«Jyl óte berekeli, astyqty boldy. 22,8 mln tonna astyq jınaldy. Eksport byltyrǵa qaraǵanda 34 paıyzǵa ulǵaıdy. Et eksportyn, byltyr biz ýáde bergendeı, 5 myń tonnadan 18 myń tonnaǵa jetkizdik. Kelesi jyly 30 myń tonnaǵa jetkizemiz dep otyrmyz. Sondyqtan, osy jyl aýyl sharýashylyǵy salasyna óte berekeli ári tabysty jyl boldy dep oılaımyz», - dedi ol.
Qyzmetińizde ne qıyndyq kezdesti degen suraqqa Ómirzaq Shókeev «úırengen qyzmet qoı» dep jaýap berdi.
Eske sala ketsek, Úkimet basshysy Baqytjan Saǵyntaev jyldy qorytyndylap, Memleket basshysynyń tapsyrmasyn oryndaýda belsendi jumys júrgizgen áriptesteriniń bárine alǵys aıtqan bolatyn. Premer-mınıstrdiń aıtýynsha, Elbasy mindettegen barlyq mindetterdi abyroımen oryndaý úshin Úkimet músheleri bar kúsh-jigerin salǵan.
