Ómirzaq Ózbekov 10 jylǵa bas bostandyǵynan aıyryldy

Bul týraly KTK telearnasy habarlady.

"10 jylǵa bas bostandyǵynan aıyrylyp, jazasyn qatań merzimdegi túzeý kolonııasynda óteıdi. Onyń ózine tıesili jáne áıelimen otbasylyq ómirde jınaǵan dúnıe-múlki tárkilenedi», - dedi úkimdi jarııa etken Astana qalasynyń qylmystyq ister boıynsha mamandandyrylǵan aýdanaralyq sotynyń tóraǵasy Meıram Janǵuttınov.

Ó. Ózbekovtyń qol astynda qyzmet etken Baqytbek Naqypbekov te 10 jylǵa bas bostandyǵynan aıyryldy. Al ekinshi orynbasary Amangeldi Jampeıisov qatań jazadan qutyldy. Ol sottalǵanymen keıin raqymshylyqqa ilinip, bosatylǵan. Sottyń pikirinshe, sottalýshylar memleket qazynasynan qarjy jymqyrǵan. Olar endi bir mıllıard teńgeden astam aıyppul tóleýi tıis.

Qylmystyq is eki jyl buryn qozǵalǵan bolatyn. Jer resýrstaryn basqarý agenttigi basshylaryna Kaspıı teńizindegi qazaqstandyq sektordyń kartasyn qurýǵa bólingen qarajatty jymqyrdy degen aıyp taǵylǵan edi. Keıin sheneýnikter memlekettiń mıllıondaǵan qarjysyn jalǵan kásiporyndarǵa aýdaryp, qolma-qol aqsha túrinde alǵandary anyqtaldy.