Ómirlik qıyn jaǵdaıǵa túsken balalardy qoldaý ortalyǵyna ornalastyrý merzimi qysqarmaq

ASTANA. QazAqparat – Ómirlik qıyn jaǵdaıǵa tap bolǵan balalardy qoldaý ortalyqtaryna ornalastyrý merzimi ózgerýi múmkin. Bul týraly «Ashyq» NQA portalynda jarııalanǵan Oqý-aǵartý mınıstriniń buıryǵynda kórsetilgen, dep habarlaıdy QazAqparat tilshisi.

«Kámeletke tolmaǵandar kámeletke tolǵanǵa deıin, otbasyna tárbıeleýge ornalastyrý múmkin bolmaǵan jaǵdaıda olarǵa kómek kórsetý jáne olardy odan ári ornalastyrý máselelerin sheshý úshin 3 aıdan aspaıtyn merzimde ómirlik qıyn jaǵdaıda júrgen balalardy qoldaý ortalyǵynda bolady», - delingen jańa redaktsııada.

Aıta keteıik, qoldanystaǵy talap boıynsha qıyn jaǵdaıǵa túsken balalar 6 aıǵa deıin qoldaý ortalyqtaryna bolatyn edi. Sonymen qatar, jańa ózgeriske saı, endi balany mundaı oryndarǵa qabyldaý aldynda onyń densaýlyq jaǵdaıy men psıhıkalyq jaı-kúıine bastapqy medıtsınalyq tekserý júrgiziledi.

«Ómirlik qıyn jaǵdaıda júrgen balalardy qoldaý ortalyǵyna alkogoldik, esirtkilik nemese ýytqumarlyq masań kúıdegi kámeletke tolmaǵandar, sondaı-aq psıhıkalyq, minez-qulqynyń buzylý aýrýlarynyń aıqyn belgileri bar kámeletke tolmaǵandar ornalastyrylmaıdy», - dep jazylǵan buıryqtyń ózgertilgen nusqasynda.

Qoldanystaǵy zańnamanyń talabynda mundaı norma joq.

Buıryq 31 qańtarǵa deıin kópshilik talqylaýda bolady.