Ómirlerin qaterge tigip, qylmyskerdi quryqtaǵan polıtseıler joǵary nagradalarǵa usynylady - brıfıng
ASTANA. Naýryzdyń 11-i. QazAqparat /Gúlmıra Álıakparova/ - Astanada kólik urlaýshy polıtsııa qyzmetkeriniń toqtaý týraly buıryǵyn elemeı, kóliktiń esigine jarmasqan ony birneshe kóshege súıregen. Búgin elordalyq Іshki ister departamentinde óz ómirin qaterge tige otyryp qylmyskerdi quryqtaǵan polıtseılerdiń erlikterin baıan etýge arnalǵan brıfıng ótti,
dep habarlaıdy QazAqparat.
ІІD bastyǵynyń birinshi orynbasary Arman Orazalıevtiń aıtýynsha, ótken seısenbi, naýryzdyń 9-y kúni keshki saǵat 20.40-ta ІІD Jedel basqarý ortalyǵynyń «102» pýltine 22 jasar avtokólik ıesi uıaly telefonnan habarlasyp, óziniń «Nıssan-Sannı» kóligin bireýler urlap ketkendigi týraly aıtqan.
Habar alǵan boıda dereý «Tosqaýyl» jospary qurylyp, ol týraly patrýldik polıtsııa polkiniń kezekte júrgen qyzmetkerleri men ekıpajdary, polıtsııa beketteri habardar etiledi.
Osy ýaqytta qyzmette júrgen kishi serjanttar Nurken Faızıev pen Nábı Omarov Maqtymquly kóshesinen Abylaıhan dańǵylyna burylǵaly turǵan urlanǵan kólikti baıqaıdy. Ury N.Faızıevtiń toqtaý týraly buıryǵyn elemeı, qozǵalysyn jalǵastyrmaq bolady. Polıtsııa qyzmetkeri kólikti joldyń jıegine burý nıetimen ashyq turǵan terezeden róldi ustaı bergende, mashına kenet joǵary jyldamdyqta ornynan qozǵalǵan. Biraq N.Faızıev róldi jibermeı, kólikti toqtatý áreketin jalǵastyrady. Sol mezette qylmyskerden birneshe soqqy da alǵan. Faızıevti asfalt ústimen 1 shaqyrymǵa jýyq jerge súıregen júrgizýshi Abylaıhan dańǵyly men Jansúgirov kóshesiniń qıylysynda «Opel-Vektra» avtokóligimen soqtyǵysyp, odan keıin metall qorshaýǵa soǵylady.
Jeke azamattyń kóligimen olardyń sońynan jetken N.Omarov, alkogoldi ishimdiktiń býyndaǵy kúdiktini quryqtap, polıtseılik narıadtyń qolyna tapsyrady. Anyqtalǵandaı, ol 1985 jyly týylǵan, Astana qalasynyń turǵyny jáne buryn-sońdy isti bolmaǵan.
Asfalt ústimen súıretilgen N.Faızıevtiń tizesi jaraqattanyp, soqqy alǵan mańdaıyna tórt tigis salyndy. «Jyldamdyqtyń joǵary bolǵany sonshalyq, etigimnen túk qalǵan joq», - deıdi ol.
Polıtseılerdiń batyl áreketteri Jedel basqarý ortalyǵynyń qala ishinde ornatylǵan beıne kameralaryna tolyǵymen jazylǵan. Astanada ondaı barlyǵy 323 kamera bar.
Aıta keteıik, jas sarbazdyń patrýldik qyzmette júrgenine 1 jyl da tolmaǵan. Al N.Omarovtyń 1,5 jyl ǵana eńbek ótili bar.
A.Orazalıev qylmyskerdi ustaý barysynda erjúrektik pen batyrlyq tanytqany úshin polıtsııa qyzmetkerlerin joǵary nagradalarǵa usyný maqsatynda Іshki ister mınıstrligine hat joldanatynyn jáne olarǵa materıaldyq syıaqylar beriletinin aıtty.
