Ómirinde shashyn kespegen 87 jastaǵy ájeıdiń burymynyń uzyndyǵy eki metrge jýyqtady

TALDYQORǴAN. QazAqparat- Ǵumyrynda shashyn qıyp kórmegen 87 jastaǵy Nursharýan Tústikbaeva Taldyqorǵan qalasynda turady. Ájeıdiń burymynyń uzyndyǵy 2 metrge jýyq. Keıýana QazAqparat tilshisine shashtyń kútimi men kıesi jaıly aıtyp berdi.

Keıipkerimizdiń aıtýynsha, shashy uzyn qyz-kelinshekterdiń boıynda jumsaqtyq, meıirim, baıyptylyq, keshirim sııaqty qasıetter bolady.

«Ǵalymdar qazir uzyn shashtyń qasıeti týraly aıta bastady. Al bizdiń ata-babamyz ony baıaǵyda zerttep, dáleldep qoıǵan. Qyzdarynyń shashyn qımaǵan, burymdylardy erekshe qurmet tutqan. Buryn qazaq qyzdary belinen asqan shashty kesýdi jaman yrym sanaǵan. Sebebi, uzyn shashty orynsyz kesý adamnyń jolyn kesip, qasiretke ushyratýy múmkin. Eń aldymen, uzyn shash - áıel kórki. Sondaı-aq shashy uzyn qyz-kelinshekterdiń minezi jumsaq, meırimdi, janashyr, sabyrly bolady»,- deıdi Nursharýan Tústikbaeva.

Keıýananyń sózinshe, shashynyń uzyndyǵy búginde 2 metrge jýyq.

«Shashymdy tarqatsam jerge túsedi. Eki metrge jýyqtady. Shashty durys kútý kerek. Bizdiń zamanymyzda qazirgideı neshetúrli sýsabyn men maılar bolǵan joq. Desek te, qolda bardy qoldandyq. Shashymyzdy aırannyń sary sýymen jýatynbyz, áli de solaı isteımin. Sosyn jaqsylap keptirip, órip, jınap tastaımyn. Eshqashan shashymdy jaıyp júrip kórmeppin. Basymnan jaýlyǵym túsken emes. Búgin sizder úshin shashymdy tarqatyp kórseteıin dálel bolsyn»,- dep kúldi Taldyqorǵandyq ájeı.

Bir áýlettiń berekesi men uıytqysyna aınalǵan keıýananyń búginde 29 nemere, 41 shóberesi bar. Kóbi - qyz balalar.

«11 qursaq kóterdim. Olardan nemere, shóberelerim bar. Qazir shópshek kútip otyrmyn. Kelinderim men qyzdaryma qyz balanyń shashy uzyn bolýy kerek dep únemi aıtyp otyram. Qazaq qyzy burymdy bolý kerek. Óıtkeni burym - sulýlyq pen sypaıylyqtyń belgisi»,- deıdi keıipkerimiz.

87 jastaǵy ájeıdiń qımyly áli de shıraq. Aǵaıyn-týǵannyń jıynyna jalǵyz ózi baryp keledi.

«Jasym 87-de bolsa da, aǵaıyn-týǵannyń jıynyna, dúkenge, shóberelerimniń mekteptegi is sharalaryna jalǵyz ózim bara berem. Kúsh-qýatym boıymda. Birinshi Allanyń, sodan keıin balalarymnyń arqasy. Úıdegi kútimim óte jaqsy. Armanym urpaǵym, qazaǵym toqshylyqta, beıbit elde ómir súrse eken. Qolda bar qundylyqtardy baǵalaı bilý kerek»,-deıdi taldyqorǵandyq ájeı.