Ómirin balmuzdaq saqtap qaldy
ASTANA. 15 maýsym. QazAqparat - Harkov qalasynda 23 jastaǵy MAI ınspektory qant dıabetimen aýyratyn adamnyń ómirin saqtap qaldy. Keıin ınspektorǵa naýqas adam alǵysyn aıtyp, syıaqy bergen.
MAI ınspektory Vasılıı Maksımenko kóshede kele jatyp, qulap qalǵan azamatty kóredi. «Aınaladaǵy adamdar ishimdik ishken adam dep oǵan esh kóńil bólmegenimen, jas ınspektor jaqyn kelip, onyń aýyryp turǵanyn baıqaǵan» dep jazady «Alash aınasy » basylymy nur.kz portalyna silteme jasap. Er adam qant mólsheri túsip ketkenin jetkizipti. Qant dıabetine shaldyqqan adamnyń qanynda glıýkoza mólsheri azaıýynan gıpoglıkemııa ustamasy bolǵan. Budan adam esinen tanyp qalýmen qatar, bas mıy zardap shegýi de múmkin. Alǵashqy kómek retinde naýqasqa qant, tátti shaı nemese shyryn berýge bolady. MAI qyzmetkeri birden dúkenge júgirip, balmuzdaq satyp ákep, qulap qalǵan adamǵa beredi. Tátti jegennen azamattyń jaǵdaıy jaqsara bastaıdy. Keıin ol mılıtsııaǵa óziniń ómirin saqtap qalǵan qutqarýshysy jaıly habarlaǵan, ınspektordyń bul áreketi oń baǵalanyp, syıaqy berilipti.
