Ómirimdi jaqsy jaqqa ózgertkim keldi - 56 jastaǵy stýdent
- Marat aǵa, elýden asqasyn qaıta partaǵa otyrǵan qıyn emes pe? Oqý týraly sheshimge qalaı keldińiz?
- Jańa nárseni úırenýge, oqýǵa esh ýaqytta kesh emes, tek ynta bolýy kerek. Al jalpy, 50 jasymda qorshaǵan ortaǵa kózqarasym ózgerdi, qundylyqtardy qaıta baǵalaı bastadym. Óz ómirimdi jaqsy jaqqa ózgertkim keldi. Qazir men osydan 5-6 jyl burynǵy Maratqa múldem uqsamaımyn.
Jaqynda balalar men jasóspirimder sport mektebine jekpe-jek jattyqtyrýshysy bolýǵa shaqyrdy. Biraq men ázirge ol jerde jumys isteı almaımyn, óıtkeni, meniń tıisti dıplomym joq. Sondaı-aq ózime oqýdyń da qolymnan keletinin dáleldemekpin. Kezinde 8-klasty bitirgennen keıin Petropavldaǵy temirjol tehnıkýmyna tústim, biraq sońǵy kýrsta tastap kettim.
«Elýden asqannan keıin oqý qıyn emes pe» deısiz. Men eshqashan qıyndyqtan qashqan emespin. Ómirdiń qıyndyǵyn pozıtıvpen qarsy alyp, jeńýge tyrysamyn. Sondyqtan aýdıtorııaǵa kirdim de, men sendermen oqımyn, jasym 54-te dedim. Jastar jaqsy qarsy aldy. Áli kúnge deıin keı stýdentter tańdanysyn jasyra almaıdy. Jas muǵalimder, Marat aǵa, sizdiń bul jerde ishińiz pyspaı ma dep suraıdy. Joq, ishim pysqan emes, maǵan bári unaıdy, barlyq pánder qyzyqty. Jastardyń arasynda ózińizdi yńǵaısyz sezinbeısiz be dep te suraıdy. Men kez-kelgen ujymǵa tez sińisip ketemin.
- Otbasyńyz týraly aıtsańyz
- Tselınogradta dúnıege kelgenmin. Anam aýrýhana meńgerýshisi boldy, ákem – oblystyq partııa komıtetinde nasıhat bóliminiń meńgerýshisi boldy. Biraq áke-sheshem aıyrlysyp, 1970 jyly anam ekeýimiz Petropavlǵa kóship keldik. Sodan osynda turyp jatyrmyn.
- Sport kolledjin tańdaýyńyzǵa ne sebep?
- Meniń ómirim sportpen tyǵyz baılanysty. Úıimiz dál stadıonnyń qasynda boldy, Kırov zaýytynyń «Energııa» stadıony, qazirgi «Dınamo», ıaǵnı meniń sportqa qyzyqpaýym múmkin emes edi. Osylaısha 6 jasymda sportqa keldim. Qandaı túrimen aınalyspadym deseńshi, voleıbol-basketbol da oınadym, dop teýip, fýtbolǵa da qatystym. Biraq ýaqyt óte kele jaýyngerlik ónerge den qoıdym. Karate-dodan qara belbeýim bar, birinshi dan ıegerimin. «Godzıý-rıý-meıbýkan» mektebinde tárbıelengenmin.
Budan basqa aǵylshyn boksyn meńgergenmin. Hatka-ıogamen aınalysamyn. Bir jyl buryn gir sportymen áýestene bastadym. 16 keli gir tastaryn bir qolmen kóterýden bastadym, qazir ony 24 kelige jetkizdim, osylaısha 50 ret kótere alamyn ár qolymmen. Bul bir jylǵy daıyndyqtyń nátıjesi. Al sport sheberi ataný úshin 140 ret kóterý qajet, men sport sheberligine úmitker atanǵym keledi.
- Demek, oqýdan basqa ýaqytyńyzdyń barlyǵy sport zalynda ótedi ǵoı?
- Iá, solaı deýge de bolady. Qazirgi ýaqytta kross-fıtten eskek esýden Reseıdiń Sankt-Peterbor qalasynda Uly Jeńiske arnalǵan halyqaralyq kýbokke qatysyp jatyrmyn. Ol bir aı boıy onlaın ótedi. Barlyǵy 6 dıstantsııa, men onyń úsheýin: 10 myń metrdi, 500 metrdi jáne 4 mınýtty óttim. Nátıjem jaman emes. Endi 30 mınýttik, 1 mınýttik jáne 2 myń metrlik qashyqtyqtar qaldy. Osy eskek esý sportymen aınalysqan bir aıdyń ishinde 16 keli salmaq tastadym. Sporttyń bul túrine oılamaǵan jerden keldim deýge bolady. Birde ótip bara jatyp, kross-fıt zalyna kirdim. Maǵan ondaǵy jumys sáti unady. Jattyǵyp jatqandardyń eń jasy – 35-ten bastalady. Arasynda qyzdar da bar. Jaı júrgen eshkim joq, birese ziltemirdi kóteredi, ony tastaı salyp, keýdeni jerden kóteredi, sekirip, beltemirge tartylady, sosyn qaıtadan bárin basynan bastaıdy. Eń qıyn, kúshti qajet etetin sport.
- Kolledjde shákirtaqy alasyz ba?
- Eki jyl boıy shákirtaqy alyp keldim. Bıyl odan qaǵyldym, óıtkeni, sabaqty bosattym. Kóp ýaqytym sportqa ketedi, sodan keıin taǵy bir- áleýmettik, ekologııalyq eki jobam bar. Ýaqytym jetpeı jatady.
- Dıplom alǵannan keıingi josparyńyz?
- Bul oqýdy bitirgennen keıin M.Qozybaev atyndaǵy Soltústik Qazaqstan ýnıversıtetine qujattarymdy tapsyramyn. Shákirt tárbıesine bet burýym múmkin.
- Áńgimeńizge rahmet!
