Ómirimde alǵash ret ne derimdi bilmeı otyrmyn, mınıstr óz isin biletin bolar - Baıan Maqsatqyzy
ASTANA. QazAqparat - Tanymal qazaqstandyq prodıýser, ártis jáne telejúrgizýshi Baıan Maqsatqyzy QR Bilim jáne ǵylym mınıstri Erlan Saǵadıevtiń UBT-nyń aldyn ala tapsyrmalaryna Baıan Esentaeva, Nurtas Adambaı jáne Ermek Tursynov týraly suraqtyń qalaı túskeni týraly bergen túsinigine qatysty pikirin bildirdi, dep habarlaıdy QazAqparat.
«Men ómirimde alǵash ret ne derimdi, buǵan qalaı pikir aıtarymdy bilmeı otyrmyn. Mınıstr óz isin biletin bolar, sondyqtan kelispeske amal joq. Jańalyqtardyń 20 paıyzy meniń esimimmen qatysty eken, olaı bolsa oqýshylardyń emtıhan tapsyrý kezinde ishteri pyspaıtyn bolady», - dep jazdy ol Instagramdaǵy paraqshasynda.
Eske sala keteıik, buǵan deıin respýblıkalyq basylymda UBT-nyń aldyn ala tapsyrmalary jarııalandy. Jurtshylyq suraqtardyń ishinen qazaqstandyq juldyzdarǵa qatysty testi baıqap qalyp, narazylyq týdyrǵan bolatyn. Olardyń pikirinshe, oqýshylardyń mektep baǵdarlamasyn bilýi shart, al juldyzdardyń ómiri týraly bilý talap etilmeýi kerek.
3 naýryz kúni QR Parlamenti palatalarynyń birlesken otyrysynda bul oqıǵa jaıly pikirin aıta kele, bilim mınıstri Erlan Saǵadıev Baıan Maqsatqyzy týraly suraqty kórmegenin moıyndady . Sondaı-aq, aldaǵy ýaqytta UBT-ǵa bul suraqtyń ený-enbeýi týraly másele jóninde aqyldasatyndaryn jetkizdi.
«Naqty suraqtar qurý barysynda taǵy da aqyldasatyn bolamyz», - dep túsindirdi ol.
Sondaı-aq, mınıstr mundaı suraqtardyń UBT-nyń aldyn ala tapsyrmalarynda bolýy esh ábestik emestigin aıtqan.
«Bul synı oqylym bolyp tabylady. Sen mátindi oqyp otyrasyń, al ol mátinde delfınder, halyq qaharmandary nemese qazirgi tańda barshaǵa belgili adamdar týraly bolýy múmkin. Odan keıin adam mátinge baılanysty suraqtarǵa jaýap beredi. Biz olardyń tanıtyn adamdary týraly (biz qazir synama emtıhandar týralyaıtyp jatyrmyz) suraqtardy engizgennen artyq eshteńe kórip turǵanymyz joq. Mysaly, sol sekildi Golovkın týraly da, Vınokýrov jaıly da suraqtar bar. Onyń eshqandaı jamandyǵy joq», - dep atap ótti mınıstr Parlament palatalarynyń birlesken otyrysynda.
