Ómirdi saqtandyrý kompanııalary bilim berýdiń jınaqtaý júıesine qatysýy múmkin

NUR-SULTAN. QazAqparat - Qazaqstanda adam ómirdi saqtandyrý naryǵynda 9 kompanııa bar. Bul týraly Qarjy naryǵyn retteý jáne damytý agenttigi Saqtandyrý naryǵy departamenti dırektorynyń orynbasary Ásel Ámirbaeva aıtty, dep habarlaıdy QazAqparat.

«Búgingi tańda Qazaqstanda ómirdi saqtandyrý naryǵynda 9 kompanııa bar. Bul naryqtyń bolashaǵy zor jáne saqtandyrý salasynyń qarqyndy damyp kele jatqan baǵyttarynyń biri bolyp tabylady.1 sáýirdegi jaǵdaı boıynsha adam ómirin saqtandyrý sharttarynyń sany 2,5 mln-nan asty. Tek bıylǵy jyldyń I toqsanda 750 myńnan astam shart jasaldy»,

- dedi Ásel Ámirbaeva.

Onyń aıtýynsha ómirdi saqtandyrý polısi ózińdi jáne týystaryńdy kútpegen jaǵdaılarda bolýy múmkin qarjylyq shyǵyndardan qaýipsizdendirýge kómektesedi, ol ólim, eńbekke jaramsyzdyq jaǵdaıynda tabysty joǵaltý jáne basqa da, sondaı-aq oqytý, ómirdegi mańyzdy oqıǵa jáne taǵy da basqa óziniń ómirlik josparlaryn iske asyrýǵa qarajat jınaqtaýǵa múmkindik beredi.

«Búginde QR Májilisinde ómirdi saqtandyrý kompanııalarynyń memlekettik bilim berý jınaqtaý júıesine qatysý múmkindigi talqylanýda. Jobaǵa sáıkes saqtandyrý polısi balanyń bilim alýyna aqsha qarajatyn memleket qoldaýymen jınaqtaýǵa múmkindik beredi, al ata-anasy qaıtys bolǵan nemese eńbekke jaramsyz bolyp qalǵan jaǵdaıda, balaǵa saqtandyrý shartynda jazylǵan oqýdyń tolyq somasyn tóleýge kepildik beriledi. Máselen, bir azamattyń balasy dúnıege keldi delik. Azamat balasy kámelet jasqa tolǵanǵa deıin onyń bilimine aqsha jınaǵysy keledi. Azamat ómirdi saqtandyrý kompanııasyna jyl saıyn jarna tóleıdi jáne bala 18 jasqa tolǵanda onyń shotynda bilim alýyna qajetti soma bolady»,

- dedi Agenttik ókili.