Ómiráli Qopabaev: Ata Zańymyz bizdi úlken jetistikterge jeteledi

ASTANA. QazAqparat - Negizgi zańymyzdy dáripteı bilýimiz kerek. Bul týraly Ata Zańymyzdyń 20 jyldyǵyna oraı quttyqtaýynda D.Qonaev atyndaǵy Eýrazııalyq zań akademııasynyń rektory Ómiráli Qopabaev málim etti.

«Búgin erekshe kún, óıtkeni 1995 jyly qabyldanǵan Konstıtýtsııamyzǵa 20 jyl tolyp otyr. Bul ataýly kún barsha Qazaqstan úshin úlken mereke. Ata Zańymyz ótken kezeńde bizdi úlken jetistikterge jeteledi. Qazaqstanymyzdyń saıası, ekonomıkalyq, áleýmettik máselelerdegi órkendeýi Negizgi zańymyzdyń arqasynda boldy. Ata Zańymyz barsha órkenıetti elderdiń Konstıtýtsııasynan kem emes. Munda halqymyzdyń negizgi quqyqtary naqty belgilengen. Sondyqtan Negizgi zańymyzdy dáripteı bilýimiz kerek jáne halqymyz ony jete túsinýi qajet»,-dedi ǵalym.

Onyń sózine qaraǵanda, keıbir shetel azamattary Konstıtýtsııany kishkene kitapsha túrinde qaltasyna salyp júredi. Sol sekildi halqymyz Ata Zańymyzdy bilip, onyń aıasynda qyzmet jasasa, adamdar eshteńeden utylmaıdy.

«Búgingi mereke barshamyzǵa qutty bolsyn! Qazaqstannyń órkendeýine barshamyz úlesimizdi qosa bileıik»,-dedi Ómiráli Qopabaev.