«Ómir súrý quqyǵy» І Respýblıkalyq baıqaýynyń jeńimpazdary anyqtaldy
ALMATY. 30 naýryz. QazAqparat - Búgin Almatyda onkologııa boıynsha BAQ ókilderi arasyndaǵy «Ómir súrý quqyǵy» dep atalatyn І Respýblıkalyq baıqaýdyń qorytyndysy jarııalandy.
Ony Qazaqstandaǵy Hofmann-Lıa Rosh Ltd kompanııasynyń qoldaýymen Qazaq onkologııa jáne radıologııa ǵylymyı-zertteý ınstıtýty uıymdastyrǵan bolatyn. Qazaqstan jýrnalıster akademııasynyń prezıdenti Saǵymbaı Qozybaev bastaǵan komıssııa qaraýyna respýblıkanyń túrli aımaqtaryndaǵy 25 jýrnalıstiń 2010 jyldyń 1-qańtarynan 2011 jyldyń 31-jeltoqsanyna deıin jaryq kórgen 47 jumysy kelip túsken.
Onda «Baspa betterindegi eń úzdik materıal» atalymy boıynsha «Aıqyn» gazetinen almatylyq Aqerke Alparova jeńimpaz atandy. 2-3 oryndy «Arý Jan» jýrnalynan almatylyq Aleksandra Kolomeets pen «Prıkaspııskaıa kommýna» gazetinen atyraýlyq Evgenııa Valısheva ıelendi.
«Eń úzdik televızııalyq materıal» atalymynda 7 arnanyń «Nysana» baǵdarlamasynan astanalyq Aınur Omar, «Asyl arna» telearnasynan almatylyq Aınur Asanova jáne «Tań» telearnasynan almatylyq O.Trýfanova úzdik úshtiktiń qatarynan oryn aldy.
Al «Radıoefır nemese ǵalamtordaǵy basylymdardaǵy eń úzdik materıal» atalymynda «Qazaq radıosynan» almatylyq A.Ómirbekov birinshi, «Mıllıoner» gazetinen L.Noda ekinshi, «VOX POPULI» fotoreportajdar saıtynan ıA.Zenkıs úshinshi oryn aldy.
