Ómir súrý daǵdyńyzǵa ózgeris sizdiń qaýipsizdigińiz úshin qabyldandy - elorda ákimi
NUR-SULTAN. QazAqparat - Elorda ákimi Altaı Kólginov tótenshe jaǵdaı rejımi kezinde qala turǵyndaryna qandaı kómek kórsetilgendigin jarııa etti, dep habarlaıdy QazAqparat tilshisi.
«Memleket basshysy Qasym-Jomart Kemeluly Toqaevtyń Jarlyǵyna sáıkes, tótenshe jaǵdaıdyń engizilgenine de bir aıdan asa ýaqyt ótti. Árqaısyńyzdyń ómir súrý daǵdylaryńyzǵa ózgeris engizgen sheshimderdiń barlyǵy da sizderdiń qaýipsizdikterińiz úshin qabyldandy. Osynaý kezeńde azamattarymyz ony túsinip, qoldaý tanytyp keledi. Ol úshin rızashylyǵymyzdy bildiremiz. Qandaı jaǵdaı bolmasyn, basymyzǵa túsken aýyrtpalyq kezinde turǵyndarǵa memleket tarapynan qoldaý kórsetilip jatyr», - dep jazdy qala basshysy Facebook paraqshasynda.
Elorda ákiminiń atap ótýinshe, Elbasy Nursultan Ábishuly Nazarbaevtyń 20 naýryz kúni halqyna arnaǵan Úndeýi el azamattaryna oı salyp, turǵyndarymyzdy áleýmettik jaǵynan qoldaýǵa serpin berdi.
«QR Tuńǵysh Prezıdenti: «Men ultty uıystyrýdyń, birlik pen qoǵamdaǵy kelisimniń mańyzdylyǵyn únemi aıtyp kelemin. Tutastyǵymyzdy taǵy bir ret dáleldeıtin kún týdy. Elimizdiń barlyq azamattaryn tózimdilik tanytýǵa, memleket qabyldap jatqan sharalardy qoldaýǵa shaqyramyn. Birlik barda alynbaıtyn asý joq», - dep atap ótti. Osy Úndeýden keıin elordamyzda #Bizbirgemiz aktsııasy aıasynda, «Nur Otan» partııasynyń bastamasymen mynadaı kómek kórsetildi: Birinshi, 9725 áleýmettik jaǵynan az qamtylǵan otbasyǵa azyq-túlik sebeti jetkizildi. Ekinshi, 7 sanat boıynsha (múmkindigi shekteýli azamattar, erekshe qajettiligi bar balalardy asyraýshylar, jetim balalar, kópbalaly analar, zeınetkerler jáne qıyn jaǵdaıǵa tap bolǵan otbasylar) áleýmettik az qamtylǵan 14 478 otbasyǵa 50 000 teńgeleı kómek berildi», - dedi ol.
Sondaı-aq onyń aıtýynsha, volonterlerdiń kómegimen 500 myńdaı medıtsınalyq maska taratyldy. Myńǵa jýyq qala turǵynyna materıaldyq emes kómekter kórsetildi. Mysaly: úıden shyǵa almaıtyn azamattarǵa, ásirese zeınetkerlerge qajetti dári-dármek, azyq-túligin jetkizý, maskalar men antıseptıkter berý júzege asyryldy. 5 100 otbasyǵa antıseptıkalyq jınaqtar berildi.
«Osy jumystarǵa tartylǵan 500-ge jýyq volonterdiń iship-jeminiń bári kómek bergen demeýshilerdiń esebinen júzege asyryldy. Osy aptada az qamtylǵan 40 myń otbasyǵa 2 mln medıtsınalyq maska taratyla bastady. Bul jaǵdaı – bárimizge birdeı ortaq aýyrtpalyq. Elbasynyń tutastyǵymyzdy tanytatyn taǵdyrly kúnde ózgeniń de jaǵdaıyn oılaýdy esten shyǵarmaıyq degen Úndeýi osyndaı sátte halqymyzdy biriktirip, birligimizdi arttyra tústi», - dedi Altaı Kólginov.
