Ómir men ólim jaıly «Joqtaý» dramasynyń treıleri shyqty

«Joqtaý» – Arýan Anartaevtyń debıýttik tolyqmetrajdy fılmi. Rejısser 2020 jyly «Ystyq kól» atty alǵashqy qysqametrajdy fılminen keıin úlken kınoǵa aıaq asty, dep habarlaıdy QazAqparat.

Jańa kartına uzaq ýaqyt shetelde ómir súrgen jáne ózin naǵyz sheteldik sezinetin jas qazaq ǵalymynyń ómir jolyn baıandaıdy.

Kúnderdiń kúni taǵdyryn aıqyndaıtyn sheshim qabyldar aldynda ol týǵan jerine oralady...

«Bul - ár kórermenge áser ete alatyn dramaǵa toly oqıǵa. Óıtkeni fılm kóteretin biz kimbiz, qaıdan keldik jáne qaıda baramyz degen suraqtar ár adamnyń júreginde júr», - deıdi kartınanyń prodıýseri Arýjan Dosymqoja.

Basty rólderde Ermek Shynbolatov, Isbek Ábilmajınov jáne Irına Barkova oınaıdy.

Kameranyń tizginin qazaq kınosyndaǵy azǵana operator qyzdardyń biri – Aıgúl Nurbolatova ustady.

Qoıýshy-sýretshi – Aıana Nurdınova. Fılmniń prodıýserleri – Arýjan Dosymqoja jáne Aleksandra Sytnık.

Fılmniń kompozıtory - Sanjar Báıterekov.

Fılmniń túsirilimi ótken jyldyń kúzinde ótti. Kınokartına avtorlary týyndyny halyqaralyq festıvalderge jiberýdi josparlap otyr.

«Joqtaý» tolyqmetrajdy kórkem fılmi ulttyq kınony qoldaý memlekettik ortalyǵy kómegimen túsirilgen.