Ómir erejege baǵynbaıtyn erkindikten qymbat - qoǵam qaıratkeri
«Qurmetti qazaqstandyqtar, jerlester! Biz uzaq ýaqyt shydap, kúresý úshin kúsh taýyp, koronavırýsqa qarsy turýǵa tyrystyq. Biraq ázirshe birde ol ılikse, birde bizdiń kúshimiz jetpeı jatyr. Búkil álem betperde taǵyp, bir-birin, óz oshaqtaryn qorǵaýdy kúrestiń negizgi tásili etip qabyldady. Biz de soǵan qosylyp, taǵy biraz shydaıyq, patrıot bolaıyq», - deıdi Baıan Ahmetjanova.
Qoǵamdyq uıym ókili sanıtarlyq normalardy saqtaýdyń qanshalyqty mańyzdy ekenine de toqtaldy.
«Bárimiz óz otbasymyzdyń qamqorshysy ekenimiz anyq. Biraq syrtqa shyǵyp, adamdarmen aralasý arqyly ınfektsııany úıge ákelýimiz múmkin. Sondyqtan ózimizdi, balalardy, qarııalarymyzdy qorǵaý úshin basy artyq barys-kelisten saqtana turaıyq degim keledi. Biz tártipti bolýymyz kerek jáne osynaý kúrdeli shaqty eńserýge tyrysýymyz qajet. Jalpyǵa ortaq erejege baǵynbaıtyn erkindikke qaraǵanda ómir qymbatyraq», - deıdi «Aradager» birlestiginiń basshysy.
Qoǵam qaıratkeri koronavırýstyń qaıtadan qarqyn ala bastaǵanynan qaýiptenip otyr. Jańa shtamdardyń bizdiń elde de tirkelýi árbir azamatty oılantýy kerek deıdi. Іndettiń zardaby aýyr bolmas úshin búginnen bastap qamdaný qajettigin, osy turǵydan kelgende Almatyda karantın talaptarynyń kúsheıtilgenin quptaıtynyn aıtady. Qajet bolsa, Qazaqstannyń ózge qalalarynda da shekteýlerdi qatańdatý kerek dep esepteıdi.
