Ómir boıyna grant taǵaıyndalatyn ádebı baıqaýǵa onlaın daýys berý bastaldy
Búgin Mecenat.kz ádebı baıqaýynyń mańyzdy kezeńi bastaldy, ıaǵnı bir aı boıy oqyrmandar Qazaqstan týraly úzdik romandy daýys berý arqyly ózderi tańdaıdy. Daýys berýde qandaı da bir quıtyrqy áreketterdi boldyrmaý úshin uıymdastyrýshylar «ekinshi kezeńde tek qazaqstandyq uıaly telefon nómiri arqyly daýys berý kerek» degen talap qosty. Sondaı-aq, daýys berýshi oqylǵan roman týraly óz pikirin qaldyrý talaby qosylyp otyr. Pikir kólemi 300-500 sımvoldan aspaý kerek. Bul pikirler moderatordyń tekserýinen ótedi. Maǵynasyz nemese ar-namysqa tıetindeı bolsa, daýys retinde eseptelmeıdi. Osylaısha uıymdastyrýshylar birinshi kezeńde birneshe ret joly kesilgen jalǵan daýys jınaý sııaqty keleńsizdiktiń aldyn almaq.
Aıta keteıik, jeńimpaz ómir boıy aı saıyn 500 dollar syıaqy alyp otyrady. Mundaı formattaǵy syıaqy álemniń esh jerinde joq. Jobanyń metsenaty – belgili qazaqstandyq qarjyger jáne fılantrop Tımýr Týrlov. Jobanyń avtory jáne júzege asyrǵan – Erlan Asqarbekov.
2022 jyldyń qyrkúıek aıynda bastalyp, mamyrdyń birine deıin sozylǵan ekinshi kezeńde 58 jazba kelip túsken edi. Onyń ishinde Qytaı Halyq respýblıkasynda turatyn avtordyń qazaq tilinde jazylǵan romany bar.
«Bıyl baıqaýǵa usynylǵan týyndylardyń sapasy birshama jaqsarǵan, tehnıkalyq talaptarǵa qatysty sáıkessizdikter aıtarlyqtaı azaıǵan. Qatysýshy avtorlar ishinde áıelder sany 37 paıyzdan 27 paıyzǵa deıin tómendegen. Al birinshi kezeńde qatysyp, bıyl taǵy da baq synaǵan avtorlar sany – úsheý. Jalpy, qatysýshylardyń jartysy – tuńǵysh roman jazǵandar. Kelip túsken shyǵarmalardyń teń jartysy qazaq tilinde.
Kásibı fılologterden jasaqtalǵan oqyrman qazylar ár shyǵarmany tolyq oqyp shyǵyp, 5 baldyq júıemen baǵa berdi. Eki rıderdiń baǵasyn qosqanda 8-den joǵary ball jınaǵan shyǵarmalar sany – 13. Bul – birinshi irikteý kezeńi.
Ekinshi irikteý kezeńinde tanymal jazýshylar Álisher Rahat pen Ilıa Odegov «sýper rıder» retinde qatysyp, qazaq tilindegi 8 roman, orys tilindegi 5 romandy oqyp, saraptap shyqty. Osylaısha qazaq tilindegi úsh roman, orys tilindegi úsh roman iriktep alyndy.
Rıderler men sýperrıderlerdiń irikteý jumysyna eshkim aralasqan joq, uıymdastyrýshylar tolyqtaı anonımdilik saqtap, qaǵazǵa shyǵarylǵan týyndylardy oqýǵa daıyndap berdi», - dep jazylǵan uıymdastyrýshylardyń resmı málimetinde.
Sonymen, myna shyǵarmalar oqyrmannyń onlaın daýys berýine usynyldy:
1) «Ólgender qaıtyp keledi», avtory Turysbek Sáýketaev
2) «Úzilme, Úmit», avtory Gúlsara Dáýletqyzy Raıymqulova
3) «Taý asqandar», avtory Ǵanı Túrikmenbaıuly Jaqsybaev
4) «I dva bokala na stole», avtory Jangúl Amangeldiqyzy Baıdáýletova
5) «V ojıdanıı Kaırosa», avtory Kemen Qudaıbergenqyzy Baıjarasova
6) «PetroKok», avtory Murat Islıamuly Ývalıev.
Daýys berý https://www.mecenatkz.com/vote.php paraqshasynda júrgiziledi.
Baılanys telefony: pr@mecenat.kz, +7 775 854 00 68
