Ómir boıy bas bostandyǵynan aıyrý ınstıtýty birtindep ólim jazasynan tolyǵymen bas tartýǵa jaǵdaı jasaıdy - M. Jarbosynova
ANA. 19 qarasha. QazAqparat /Qanat Mámetqazyuly/ -Ómir boıy bas bostandyǵynan aıyrý ınstıtýty birtindep ólim jazasynan tolyǵymen bas tartýǵa jaǵdaı jasaıdy. Búgin «Qazaqstandaǵy ómir boıy bas bostandyǵynan aıyrý ınstıtýty: reformalaý múmkindikteri» atty taqyrypta ótip jatqan konferentsııa barysynda Syrtqy ister mınıstrligi Erekshe tapsyrmalar jónindegi elshisi Mádına Jarbosynova osylaı málim etti.
«Qazaqstanda Memleket basshysynyń ólim jazasyna moratorıı engizý týraly jarlyǵyna sáıkes, 2004 jyldan beri elimizde Konstıtýtsııaǵa tıisti ózgerister engizildi. Bundaı ózgeristerdi júzege asyrý maqsatynda 2009 jyly birqatar zańdarǵa da tolyqtyrýlar jasaldy. Budan bólek, qazirgi ýaqytta Qazaqstannyń Azamattyq jáne saıası quqyqtar týraly halyqaralyq paktiniń ekinshi fakýltatıvtik hattamasyna qosylý qajettiligi týraly máseleler talqylanýda», - dedi M. Jarbosynova.
Sonymen birge, elshi Qazaqstannyń aǵymdaǵy jylǵy qyrkúıekte ólim jazasyna qarsy halyqaralyq komıssııanyń quryltaıshy-memleketter tobyna qosylǵanyn jetkizdi. «Atalǵan komıssııaǵa aǵymdaǵyjyly Ispanııa eliniń úkimeti bastamashylyq jasady. Bundaǵy maqsat álem elderi boıynsha ólim jazasyn tolyq joıý bolyp tabylady. Al Qazaqstannyń osy komıssııaǵa qatysýynyń ózi bizdiń elimizdiń osy baǵyttaǵy nıetin, erik jigerin, adamı ólshemder salasyndaǵy jalpylama moıyndalǵan standarttardy ustanatyndyǵyn kórsetip otyr», dedi M. Jarbosynova.
Onyń aıtýynsha, ómir boıy bas bostandyǵynan aıyrý ınstıtýty ólim jazasyna kesýdi meılinshe tómendetip, odan tolyǵymen bas tartýǵa múmkindikter jasaıdy.
