Ómir boıǵy bas bostandyǵynan aıyrý jazasyna kesilgennen keıingi alǵashqy túnin Múbárák jansaqtaý bólimshesinde ótkizdi
ASTANA. 3 maýsym. QazAqparat - Egıpettiń burynǵy prezıdenti Hosnı Múbárák ómir boıǵy bas bostandyǵynan aıyrý jazasy kesilgennen keıingi alǵashqy túnin abaqty aýrýhanasyndaǵy jansaqtaý bólimshesiniń tóseginde ótkizdi.
Ol Kaır mańyndaǵy Tora abaqtysyna Polıtsııa akademııasy ǵımaratynda úkim shyǵarylǵannan keıin jetkizildi, dep habarlaıdy ITAR TASS.
Múbárák eki saǵat boıy ushaqtan túsýden bas tartqan. Al túrmedegi kameraǵa kirgennen keıin ol aıqaı salyp, artynan jylaǵan. Onyń taǵdyry endigi ýaqytta prezıdent bolatyn adamnyń qolynda. Egerde prezıdenttik saılaýdyń ekinshi kezeńinde áskerı kadr jáne Múbáráktiń sońǵy premeri bolǵan Ahmed Shafık bılik basyna kelse, onda Múbárákqa keshirim jasalýy múmkin. Al "Musylman baýyrlar" atynan kandıdat bolyp otyrǵan Muhammed Mýrsı prezıdent bolsa, onda Hýsnı Múbárák ómir boıy túrmede otyrady.
Aıta keteıik, Prokýrorlar Múbárák pen eks-mınıstrge 2011 jyly "Arab kóktemi" kezinde úkimetke qarsy halyq tolqýlarynda qaza tapqan 850 adamnyń ólimine kináli degen aıyp taqty. Ol tolqýlardyń nátıjesinde Hosnı Múbárák bılikten ketken edi.
