«Omıkron» shtamy: BQO-da shetelden kelgen 100-den astam qazaqstandyq baqylaýǵa alyndy
BQO sanıtarlyq-epıdemıologııalyq baqylaý departamenti basshysynyń orynbasary Gúldana Kereevanyń óńirlik kommýnıkatsııalar qyzmeti alańynda málim etkenindeı, sonyń ishinde Mysyrdan 69, Ulybrıtanııadan 19, Italııadan 13, Germanııadan 11 adam kelgen.
Álemde «Omıkron» shtamynyń taralýyna baılanysty olardyń barlyǵy turǵylyqty jeri boıynsha medıtsnalyq baqylaýǵa alyndy.
G.Kereevanyń sózine qaraǵanda, «Omıkron» shtamy 106 elde anyqtaldy. Sońǵy derekter boıynsha jańa shtamm Japonııa, Brazılııa, Aýstrııa, Chehııa, Germanııa jáne basqa memleketterde tirkelgen. Kórshiles Reseıde 41 adamnyń osy dertke ilikkeni málim boldy.
«Oblys aýmaǵynda «Omıkron» shtamy tabylǵan joq. Degenmen COVID-19 epıdemıologııalyq qadaǵalaý júıesinde SARS-COV-2 jańa nusqalaryn ýaqtyly anyqtaýdyń mańyzdylyǵyn eskere otyryp, kovıd tabylǵan naýqastardyń oń nátıje qorytyndylary Nur-Sultan qalasyndaǵy Ulttyq saraptama ortalyǵyna jiberildi. Bular zerttelýde», dedi G.Kereeva.
Onyń aıtýynsha, 1 jeltoqsannan beri 280 adamnan indet tabyldy. Ótken aıdyń osy merzimimen salystyrǵanda, aýrý juqtyrý kórsetkishi 2,2 esege azaıdy. Al sońǵy aptada (17-23 jeltoqsan) aldyńǵymen (10-16 jeltoqsan) salystyrǵanda, 28,7 paıyzǵa (80-nen 57-ge) tómendedi.
«Jeltoqsan aıynda 37 oqýshy jáne 8 muǵalimnen, sondaı-aq joǵary oqý oryndarynda bilim alatyn 2 stýdentten koronavırýs anyqtaldy. Olardyń bári de ınfektsııany óz úıindegi týystarynan juqtyrǵan», dedi G.Kereeva.
Eske sala keteıik, budan buryn Batys Qazaqstanda karantın talabyn buzǵandarǵa 35 mln astam teńge aıyppul salynǵanyn jazǵan bolatynbyz.