Omıkron shtamy basqalaryna qaraǵanda 5-7 ese juqpaly – Sarhat Beısenova

NUR-SULTAN. QazAqparat – Omıkron shtamy basqalaryna qaraǵanda 5-7 ese juqpaly jáne qaıta juqtyrý qaýpi joǵary. Bul týraly Nur-Sultan qalasynyń bas memlekettik sanıtar dárigeri Sarhat Beısenova málim etti, dep habarlaıdy QazAqparat tilshisi.

«Sońǵy 2 jyl boıy biz jańa jaǵdaıda ómir súrip jatyrmyz. Birneshe lokdaýnnan aman shyqtyq. Jaǵdaıymyz endi ońalady degende jańa qaýip - omıkron shtamy paıda boldy. Ol osy kúnge deıin anyqtalǵan shtamdarǵa qaraǵanda 5-7 ese juqpaly, ıaǵnı juqtyrǵan adam ınfektsııany koronavırýstyń aldyńǵy nusqalaryna qaraǵanda bir-eki kúnnen keıin tartýy múmkin jáne qysqa merzimde qaıta juqtyrý qaýpi joǵary», - dedi Sarhat Beısenova qala ákimdiginde onlaın ótken baspasóz máslıhatynda.

Onyń aıtýynsha, elordada COVID-19 indetiniń tez ósýine baılanysty epıdemıologııalyq jaǵdaı kúrdeli.

«Sondyqtan aýrýdyń alǵashqy belgileri baıqalǵan sátte múmkindiginshe birden oqshaýlanýdy usynamyn. Sebebi, 12 jasqa deıingi balalar, vaktsınatsııalanbaǵan jáne sozylmaly aýrýy bar adamdarǵa áli de qaýip joǵary, tıisinshe siz olarǵa qater tóndiresiz», - deıdi ol.