«Omıkron» balalarda da aýyr ótip jatyr – ınfektsıonıst
Dárigerler úshin eresekterge de, balalarǵa da birdeı áser etetin jańa «omıkron» shtamynyń paıda bolýy qıyndyq týdyryp otyr. Balalar juqpaly aýrýlary kafedrasynyń meńgerýshisi, dáriger-ınfektsıonıst Dınagúl Baesheva ınfektsııanyń qaýpi jáne onyń taralýynyń aldyn alý joldary týraly aıtty, dep habarlaıdy QazAqparat Nur-Sultan ákimdiginiń resmı saıtyna silteme jasap.
Dınagúl Baeshevanyń aıtýynsha, qazir respıratorlyq vırýsty aýrýlar deńgeıiniń kóterilýi kezeńinde tumaýmen qatar koronavırýs ınfektsııasy erekshe alańdaýshylyq týdyrýda.
«Bul problema áli de ózekti bolyp sanalady, óıtkeni elimizde asa juqpaly «omıkron» shtamy paıda boldy. Onyń berilý jyldamdyǵy «delta» shtamynan birneshe ese joǵary. Kez kelgen jastaǵy adamǵa, onyń ishinde balalarǵa da ońaı tıip jatqan joq. Sheteldik dárigerlerdiń málimetinshe, «omıkron» balalarda da aýyr ótip jatyr, ony biz de óz kózimizben kórip otyrmyz. Koronavırýstyń qandaı shtamy bolmasyn ımmýnokomprometırlengen adamdarda, qosymsha aýrýy bar naýqastarda, sol sııaqty onkologııalyq aýrýlarmen, ımmýn tapshylyǵy jaǵdaılarymen jáne ózge de ilespe aýrýlarmen aýyratyn naýqastarda erekshe aýyr ótedi», - dep túsindirdi dáriger.
Onyń aıtýynsha, aýrýdyń eksponentsıaldy túrde ósip ketpeýi jáne kúnine myń nemese odan da kóp adam aýyrmaýy mańyzdy.
Ol úshin azamattar epıdemııaǵa qarsy is-sharalardy qatań saqtaýy tıis: áleýmettik qashyqtyq, maska rejımi, qol jýý, qoldy kózdiń jáne murynnyń shyryshty qabatyna tıgizbeý, adam kóp jınalatyn oryndarǵa barmaý.
«Ókinishke qaraı, biz kishkentaı balasy bar ata-analardyń saýda ortalyqtarynda alańsyz serýendep júrgenin jıi kóremiz. Qazirgideı jaǵdaıda mundaı oryndarda demalý orynsyz. Eger balańyzdyń densaýlyǵyn oılasańyz barynsha túsinistikpen qarap, oqshaýlanǵan oryndarda demalǵanyńyz jón. Biz elimizdegi barlyq statsıonarlar boıynsha taldaý júrgizip, 2021 jáne 2020 jyldary koronavırýs ınfektsııasymen aýyrǵandardyń sanyn salystyrdyq. Nátıjesinde 2021 jyly KVI-men aýyratyndar sany 5 ese, al aýyr naýqastar sany 20 ese óskenin kórdik», - dedi ınfektsıonıst.
Ol ata-analardy balalarynyń respıratorly aýrý belgileri bar týystarymen, jaqyndarymen, tanystarymen qarym-qatynasta bolmaý kerektigin aıryqsha atap ótti. Sebebi koronavırýstyń belgileri uqsas: jutqynshaqtyń aýyrýy, jótel jáne t. b.
Dáriger vaktsınatsııany COVID-19-dan qorǵanýdyń ońtaıly jáne tıimdi sharasy dep atady.
«Búkil álemdik qaýymdastyq vaktsınatsııanyń tıimdiligine kóz jetkizdi. Eger balamyzdy aýyr asqynýlardan saqtaǵymyz kelse mindetti túrde vaktsınatsııalaýymyz kerek. 2021 jyly vaktsınatsııany ýaqytyly alǵandardy qutqarý múmkin boldy, al vaktsınanyń tólqujatyn satyp alǵandardan aıyrylyp qaldyq. Balalar bul aýrýdy ońaı ótkerse de vırýstyń keıingi saldary qandaı bolaryn bilmeımiz. Koronavırýsqa qarsy vaktsınatsııa búgingi tańda eń tıimdi aldyn alý sharalarynyń biri bolyp sanalady», - dep qorytyndylady Dınagúl Baesheva.