Ombyda etnıkalyq qazaqtardyń basyn qosqan bıznes-forým ótti

OMBY. QazAqparat - RF Omby qalasynda etnıkalyq qazaqtardyń basyn qosqan bıznes-forým ótti. Atalǵan shara shet elde turatyn etnıkalyq qazaqtar jáne sol elge qonys aýdarǵan otandastarmen baılanys ornatý jóninde Tuńǵysh Prezıdent–Elbasy bergen tapsyrmany júzege asyrý maqsatynda qurylǵan «Otandastar qory» baǵdarlamasynyń bir bóligi, dep habarlaıdy QazAqparat .

Basqosýda «Otandastar qory» birinshi vıtse-prezıdenti Talǵat Adýov forýmǵa qatysýshylardy qor qurylymy men mehanızmderi týraly aıtyp berdi. Ásirese álemdegi qazaq dıasporasyn biriktiretin quramyna «Atameken» iskerlik úıin men «Abaı» mádenı úıi kiretin «Qazaq House» mádenı- iskerlik úıi jobasyna erekshe nazar aýdardy. T.Adýov «Qazaq House» -tyń negizgi tujyrymymen, onyń qyzmet baǵytymen jan-jaqty tanystyrdy.

Budan bólek, «Atameken» iskerlik úıi qyzmeti túsindirilip, onyń shet eldegi kásipker qandastarǵa usynatyn múmkindikteri týraly áńgime órbidi. Forýmǵa qatysýshylar «Atameken» iskerlik úıine qatysty qyzyǵýshylyq bildirip, onyń damýyna qatysty óz usynystary bolatynyn atap ótti.

Qatysýshylar tarapynan sóz alǵan Omby qazaqtary qaýymdastyǵynyń ókili Alına Smykova etnıkalyq belgisi qoıylǵan ónim shyǵaratyn sheberhana uıymdastyryp, ony Reseı óńirlerine taratý múmkindigin qarastyrý jaıly áńgimeledi. Al Rınat Tókenov memleket-jekeshelik seriktestigi boıynsha ulttyq nyshanda balabaqsha ashýdy, ondaı mekemeniń qazir óte qajet ekeni týraly aıtty. Serik Rahymov bolsa Reseıden Qazaqstanǵa astyq pen qıyrshyq tas jetkizýdegi qıyndyqtar jaıly aıtyp, qor ókilderiniń osy máseleniń sheshilýine kómektesýin surady.

Bıznes forýmǵa qatysýshylar jıyn sońynda Omby óńiri qazaqtarynyń oblysta «Abaı» mádenı úıiniń qurylýyna qoldaý kórsetýge, «Otandastar» qory uıymdastyratyn is-sharalar men jobalarǵa qatysýǵa jáne bıznes yntymaqtastyqqa qatysty óz usynystaryn ázirleýge yqylas bildirdi.