Ombyda apaly-sińlili qyzdardy óltirgen kúdikti 24 jyldan keıin Pavlodardan ustaldy
Qazaqstan azamaty 1997 jyly Ombyda bir qyzdy qarýmen atyp, al ekinshisin pyshaqtap óltirgen.
«Oblystyq polıtsııanyń kóshi-qon qyzmetkeri Gúlstan Battalovanyń qyraǵylyǵynyń arqasynda 24 jyl boıy tergeý organdarynan jasyrynyp kelgen er adam anyqtaldy» dep málim etti Pavlodar oblystyq polıtsııa departamentiniń baspasóz qyzmeti.
1997 jyldyń naýryzynda Reseıdiń Omby qalasynda 30 jastaǵy azamat kıkiljiń kezinde 25 jastaǵy qyzdy basynan atyp jiberedi, al onyń 22 jastaǵy sińlisine birneshe jerden pyshaq suǵyp alady.
Pavlodar oblysy polıtsııa departamentiniń bastyǵy Nurlan Másimovtyń aıtýynsha, ekeýi de alǵan jaraqatynan oqıǵa ornynda kóz jumǵan. Kúdikti mas bolǵan.
Qylmys jasaǵannan keıin ol qashyp ketken. Kúdiktige memleketaralyq izdeý jarııalanady.
«54 jastaǵy Qazaqstan azamaty azamattyq anyqtaý úshin kóshi-qon qyzmetine qujat ótkizgen. Osy kezde onyń izdeýde júrgen kúdikti ekeni áshkere bolǵan. Polıtsııa podpolkovnıgi er adamdy tanyǵan», - dep atap ótti Nurlan Másimov.
Pavlodar polıtseıleri Reseıdiń Omby oblysynyń tergeý organyna habarlama joldady.
Búginde Ertis óńirinde «Mıgrant» jedel aldyn alý sharasy ótip jatyr. Onyń barysynda 430 adam jaýapkershilikke tartyldy. 21 sheteldik sot úkimimen elden qýyldy.
