Ombyda «Abaı úıi» qazaq mádenı-iskerlik úıi ashyldy

⠀OMBY. QazAqparat – 22 qyrkúıekte «Otandastar qory» KEAQ Dúnıejúzi qazaqtar qaýymdastyǵymen birlesip, QR Aqparat jáne qoǵamdyq damý, Syrtqy ister mınıstrlikteriniń jáne RF Omby oblysy Úkimetiniń qoldaýymen onlaın-formatta Ombyda «Abaı úıi» qazaq mádenı-iskerlik úıiniń saltanatty ashylýyn ótkizdi. Bul týraly QazAqparat «Otandastar qoryna» silteme jasap habarlaıdy.

⠀Іs-sharaǵa QR Aqparat jáne qoǵamdyq damý vıtse-mınıstri Marat Ázilhanov, QR Syrtqy ister mınıstrliginiń, Omby qalasyndaǵy Qazaqstan Respýblıkasy konsýldyǵynyń ókilderi, sondaı-aq «Otandastar qorynyń» basshylary, «Omby qazaqtary» qoǵamdyq birlestiginiń ókilderi jáne t. b. qatysty.

⠀Kezdesý aıasynda qazaq mádenı-iskerlik úıiniń tusaýkeseri ótti, sondaı-aq Reseıdegi qazaqtardyń mádenı, iskerlik jáne bilim berý qyzmetin qoldaýǵa baǵyttalǵan birlesken jobalardy iske asyrý máseleleri talqylandy.

⠀Jıyn barysynda «Abaı úıi» qazaq mádenı-iskerlik úıleriniń qazaq mádenı murasyn keńinen nasıhattaý, sheteldegi otandastarmen iskerlik jáne gýmanıtarlyq baılanystardy nyǵaıtý boıynsha maqsattary men mindetteri aıtyldy.

⠀Atap óter jaıt, 2020 jyldyń sońyna deıin «Otandastar qory» Qyrǵyzstanda (Bishkek q.), Ózbekstanda (Tashkent q.), Germanııada (Berlın q.), Túrkııada (Ystanbul q.) «Abaı úıi» atty taǵy 4 qazaq mádenı-iskerlik úıin ashýdy josparlap otyr.