Omby mektebinde qazaq mádenı ortalyǵy ashylady

PAVLODAR. QazAqparat - Ertis aýdany pedagogtarynyń bir toby Reseı Federatsııasy Omby qalasynyń mektepterin aralady, dep habarlaıdy QazAqparat pavlodarnews.kz silteme jasap.

Aýdandyq bilim berý bóliminiń bergen aqparatyna sáıkes, sapar halyqaralyq yntymaqtastyq aıasynda júzege asqan.

«Ertis aýdanynyń Severnyı jalpy orta mektebi Reseıdiń Omby qalasynyń mektepterimen 15 jyl boıy tyǵyz qarym-qatynas ornatqan, - dep málim etti aýdandyq bilim berý bólimi. - L.Polışýk atyndaǵy №97 mektepte bolǵanda taraptar birqatar kelisimderge qol jetkizdi. Sonyń nátıjesinde mektep ishinde qazaq mádenı ortalyǵyn ashý jónindegi memorandýmǵa qol qoıyldy».

Memorandýmǵa L.Polışýk atyndaǵy №97 mektep dırektory Olga Maltseva men Severnyı jalpy orta mektebiniń dırektory Nyǵman Júsipov qol qoıdy. Qujatqa sáıkes, Ertis aýdany men Omby oblysynyń shekaralas mektepteriniń jelilik qoǵamdastyǵyn keńeıtý josparlanǵan.

Kezdesý sońynda Ertis aýdandyq bilim berý bóliminiń basshysy Samal Qadyrova Ombynyń №97 mektebi oqýshylaryna «Qazaq handyǵy» zııatkerlik oınyn syıǵa tartty. Sol arqyly ombylyq jas jetkinshekter oıyn ádisimen qazaq mádenıetimen tanysa alady.