«Omby qazaqtary» balalar úıine quny 80 myń rýbl turatyn qondyrǵyny tartý etti (FOTO)
Búgin, 5 shildede «Omby qazaqtary» belsendiler toby mamandandyrylǵan balalar úıine arnaıy jabdyqtar men balalardyń kıimderin syılady. Tartý etilgen zattardyń jalpy quny - 80 myń rýbl.
«Balalar úıiniń» atynan «Omby qazaqtary» men kásipkerlerge alǵys aıtamyn. Qamqorsyz qalǵan balalarǵa qolushyn beretin adamdardyń bar ekeni qýantady. Qajetti qondyrǵylar bar. Degenmen, qosymsha esh ýaqytta artyq bolmaıdy», - dedi Omby Mamandandyrylǵan balalar úıi bas dárigeriniń emdeý máseleleri boıynsha orynbasary Svetlana Romanycheva.
Onyń aıtýynsha, syılanǵan jańa qurylǵylar mıdyń sal aýrýynan zardap shegetin balalardy qalpyna keltirýge kómektesedi. Balalar úıinde tórt jasqa deıingi baldyrǵandar tárbıelenedi.
Kerek qarajatty «Omby qazaqtary» tobynyń qarapaıym músheleri jınaǵan jáne Omby kirpish zaýytynyń bas dırektory Dáýlen Sadýaqasov, «Tsarıtsa» saqtandyrý kompanııasynyń Omby fılıalynyń dırektory Mahabbat Kópturova, «Cherlak bazary» dırektsııasynyń ókili Jumabaı Sátkenov, jeke kásipker Murat Alpysovtar demeýshilik kórsetken.