Ombýdsmenniń BUU-nyń arnaıy baıandamashysymen kezdesýinde nátıjeli árekettestikti jalǵastyrý qajettiligi atap ótildi

ASTANA. QazAqparat - Búgin Astanada BUU-nyń Beıbit jınalys jáne qaýymdastyq quqyǵy jónindegi arnaıy baıandamashysy M. Kıaıdyń Qazaqstanǵa resmı sapary aıasynda QR Adam quqyqtary jónindegi ýákili A. Shákirovpen kezdesýi ótti.

Júzdesý barysynda Qazaqstandaǵy adam quqyqtaryn qamtamasyz etý, quqyq qorǵaý salasyndaǵy mindetterdi ımplementatsııalaý, atalǵan baǵytta azamattyq qoǵamnyń jáne memlekettik organdarynyń qarym-qatynasy týraly máseleleri jan-jaqty talqylandy

A. Shákirov halyqaralyq sarapshyny ulttyq quqyq qorǵaý mekemesi qyzmetiniń erekshelikterin jáne negizgi baǵyttaryn, onyń memlekettik-quqyqtyq júıesindegi roli men orny týraly habardar etti.

Sondaı-aq adam quqyqtary salasyndaǵy zań shyǵarýshylyq pen quqyq qoldaný tájirıbesi, sonyń ishinde beıbit jınalystar men qaýymdastyqtardyń máselelerin retteý jóninde tolyq aqparat berildi.

Óz kezeginde, M. Kıaı Ombýdsmenniń Qazaqstandaǵy bar quqyq qorǵaý talaptarynyń kózqarasyndaǵy usynǵan aqparatynyń mańyzdylyǵyn atap kórsetti.

Adam quqyqtary jónindegi Ámbebap kezeńdik sholý turǵysynan Qazaqstannyń sholýǵa qatysty usynymdaryn jáne BUU-nyń ózge tetikterin oryndaý jónindegi sharalary týraly pikir almasý ótti.

Kezdesý qorytyndysy boıynsha Ombýdsmen naqty quqyq qorǵaý baǵyttarynyń jumysy sheńberinde BUU-nyń mamandandyrylǵan qurylymdarymen nátıjeli árekettestigin jalǵastyrý qajettiligi týraly ortaq pikir bildirildi, dep haıýarlaıdy QR Adam quqyqtary jónindegi ýákil apparatynyń baspasóz qyzmeti.