Ombýdsmen ókilderi Semeı jáne Petropavl qalalarynda balalar quqyqtarynyń saqtalýymen tanysty
Bul týraly Adam quqyqtary jónindegi ýákildiń baspasóz qyzmetinen habarlandy.
Onda ombýdsmenniń ókilderi jergilikti densaýlyq saqtaý, bilim berý jáne áleýmettik qorǵaý memlekettik mekemeleriniń jaǵdaıymen tanysty.
Ortalyq qyzmetkerleri Semeı qalasynda ornalasqan jetim balalarǵa arnalǵan № 5 kómekshi mektep-ınternatynda,№8 jáne №3 balalar úıinde, nashar estıtin balalarǵa arnalǵan № 4 mektep-ınternatynda, Sańyraý balalarǵa arnalǵan mektep-ınternatynda, Kámeletke tolmaǵandardy beıimdeý ortalyǵynda boldy. Delegattar atalmysh ınternattardaǵy balalardyń quqyqtaryn saqtaý jáne qorǵaý baǵytyndaǵy jergilikti bılik pen mekeme qyzmetkerleriniń jumysyn oń baǵalady.
«ShQO-da balalardy áleýmettik-patronajdyq qoldaý júıesi sátti iske asýda. Sonyń arqasynda jergilikti iskerlik top ókilderi, bıýdjettik uıymdar men balalar úıiniń tárbıelenýshileri arasynda ózara tyǵyz qarym-qatynas ornaǵan. Mundaı biregeı tájirıbeni eldiń basqa da aımaqtarynda qoldanýǵa bolady», - delingen habarlamada.
SQO-da bolǵan saparda ortalyq ókilderi balalar úıine, jetim jáne ata-anasynyń qamqorlyǵynsyz qalǵan balalarǵa arnalǵan mektep-ınternatyna, kámelettik jasqa tolmaǵan balalardy beıimdeý ortalyǵyna, jasóspirimder úıine, tirek-qımyl apparaty zaqymdanǵan múgedek balalarǵa arnalǵan Petropavl ınternat-úıine, Petropavl balalar psıhonevrologıalyq úı-ınternatyna, turǵylyqty jeri joq adamdarǵa arnalǵan Petropavl qalalyq áleýmettik beıimdeý ortalyǵyna bas suqty.
Mekemelerdi aralaý barysynda sarapshylar adam quqyqtarynyń iske asyrylýyna taldaý jasady. Ásirese balalardyń bilim alýǵa, densaýlyq saqtaý, aqparatty erkin alý quqyqtarynyń oryndalýyna úlken kóńil aýdaryldy.
Sapar qortyndysynda balalar mekemeleriniń basshylyǵyna ujymnyń kásibı biliktiligi men deńgeıin arttyrý, balalar quqyqtaryn saqtaýda halyqaralyq jáne ulttyq standarttardy qatań ustaný boıynsha usynystar jasady.
