Ombýdsmen EQYU-dan azaptaýdy tergeýge tehnıkalyq kómek surady
Taraptar ombýdsmen ınstıtýtynyń EQYU mıssııasymen yntymaqtastyq formatyn aıqyndady, aldaǵy birlesken jobalardyń negizgi aspektilerin, sondaı-aq óńirlik jáne halyqaralyq quqyq qorǵaýshy kún tártibiniń birqatar ózekti máselelerin talqylady.
Lastaev halyqaralyq dıplomatty Qazaqstandaǵy adam quqyqtary salasyndaǵy jaǵdaı týraly habardar etti. Júrgizilip jatqan konstıtýtsııalyq reforma aıasynda Ombýdsmenniń quqyqtyq jaǵdaıymen, onyń jańa ókilettikterimen, sondaı-aq ýákildiń óńirlik ókilderiniń tarmaqtalǵan jelisiniń qyzmetin uıymdastyrýmen tanystyrdy.
Áńgime barysynda Ombýdsmen doktor Frobarttan azaptaýdy tergeýde jáne memlekettiń beıbit jınalystardy kásibı retteýi salasynda tehnıkalyq kómek kórsetý bóliginde saraptamalyq qoldaý surady.
Sondaı-aq qoǵamnan ýaqytsha oqshaýlaý oryndarynda adam quqyqtarynyń buzylýynyń aldyn alý boıynsha qabyldanyp jatqan joǵary tehnologııalyq sheshimderge nazar aýdaryldy.
«Búgingi tańda barlyq jabyq tıptegi mekemeler úzdiksiz beınebaqylaýmen jabdyqtalǵan, ákimshilik qyzmetkerleriniń qatysýysyz qadaǵalaý organdaryna ótinish berý úshin 243 termınal jumys isteıdi. Sottalǵan azamattarǵa elektrondyq memlekettik qyzmetterge qol jetkizýdi kezeń-kezeńimen usyný josparlanýda», - dep, atap ótti Artýr Lastaev.
Óz kezeginde, doktor Frobart Astanadaǵy EQYU-nyń keńsesi ombýdsmen ınstıtýtyna ýákildiń óńirlik ókilderiniń áleýetin damytýǵa jáne nyǵaıtýǵa járdemdesýdi qosa alǵanda, keń aýqymdy máseleler boıynsha qoldaý kórsetýge nıetti ekenin aıtty.
Sońynda taraptar ózara syılastyq pen uzaq merzimdilik qaǵıdattaryna negizdelgen senimgerlik áriptestikti odan ári damytýǵa tolyq yqpal etýge ýaǵdalasty.
Foto: gov.kz
