Ombydaǵy forým: Toqaev kólik-logıstıka salasyndaǵy jańa mindetterdi belgiledi
ASTANA. KAZINFORM — Memleket basshysynyń pikirinshe, álemdegi eń uzyn ári tutas qurlyq shekarasymen túıisken Qazaqstan men Reseıge Eýrazııadaǵy kólik-logıstıka júıesiniń damýynda jetekshi ról atqarýdy taǵdyrdyń ózi buıyrtyp otyr. Bul týraly Aqorda málim etti.
— Bul — qazirgi óte kúrdeli geosaıası jaǵdaıda elderimizdiń jahandyq básekedegi artyqshylyǵyn aıqyndaıtyn basty faktor. Biz kúsh-jiger jumyldyrýdyń arqasynda bul saladaǵy barlyq mindetti tabysty eńserip, ınfraqurylymdy júıeli damytyp kelemiz ári tranzıttik áleýetimizdi nyǵaıta tústik. Ótken jyly elderimiz arasyndaǵy temirjol kóligimen júk tasymaldaý 3,5 paıyzǵa artyp, 92 mıllıon tonnany qurady. Sonymen qatar Qazaqstan aýmaǵy arqyly tranzıt tasymaly jandana tústi. Tek sońǵy bes jylda Qytaı — Reseı — Qytaı baǵyty boıynsha Qazaqstan terrıtorııasynan ótken konteınerlik tasymaldyń kólemi segiz ese artty. Reseı — Qazaqstan — Qytaı baǵytyndaǵy mıllıonynshy konteıner eleýli meje boldy. Álbette, munymen shektelip qalmaımyz. Avtomobıl kóligimen tasymaldaý da eselene tústi. Byltyr onyń kólemi 8,5 mıllıon tonnadaı bolǵan. Bıylǵy birinshi toqsannyń qorytyndysy boıynsha ótken jylǵy kezeńmen salystyrǵanda 4,3 mıllıon tonnaǵa jetip, eki eseden asa ulǵaıdy. Bul saladaǵy birlesken júıeli jumysty jalǵastyrsaq, osy qarqyndy saqtap qalýǵa ábden bolady. Men buǵan senimdimin, — dedi Qasym-Jomart Toqaev.
Prezıdent Soltústik — Ońtústik dálizin damytýǵa aıryqsha mán berilip otyrǵanyna nazar aýdardy. Byltyr bul taraptaǵy júk tasymaly edáýir ósken. Taǵy bir mańyzdy baǵyt — Batys Eýropa — Batys Qytaı dálizi. Qasym-Jomart Toqaevtyń aıtýynsha, Aqtóbe — Ulǵaısyn jolyndaǵy rekonstrýktsııa dálizdiń ótkizý múmkindigin eki ese arttyrýǵa múmkindik beredi.
— Qoldanystaǵy tsıfrlyq platformalar bazasynda «Qazaqstan — Reseı» tsıfrlyq kólik dálizin pılottyq rejımde iske qosýdy usynamyn. Sebebi bul — kólik nópiri kóp baǵyttardyń biri. Eki eldiń kólik-logıstıka júıesin tsıfrlyq turǵyda tıimdi ıntegratsııalaý jáne jańa tehnologııalardy keńinen qoldaný bizge ózara saýda-sattyq kólemin ulǵaıtyp, kólik aǵynyn arttyrýǵa jáne jan-jaqty ekonomıkalyq baılanystardy nyǵaıtýǵa múmkindik beredi. Bıyl mamyr aıynda Vladımır Vladımırovıch Pýtınniń Qazaqstanǵa jasaǵan memlekettik sapary aıasynda júrgizýshisiz júk kólikteri alǵash ret eki el eki ortasynda qatynady. Muny aıtýly ýaqıǵa deýge bolady. Osynaý sátti tájirıbe Qazaqstan men Reseıdiń kólik salasyndaǵy seriktestigi jańa tehnologııalyq deńgeıge shyqqanyn kórsetti, — dedi Memleket basshysy.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
