Ombyda ál-Farabı atyndaǵy QazUÝ ókildigin ashý josparda bar — Prezıdent
ASTANA. KAZINFORM — Ombyda ál-Farabı atyndaǵy Qazaq ulttyq ýnıversıtetiniń ókildigin ashý josparda bar. Bul týraly Qazaqstan Prezıdenti Qasym-Jomart Toqaev «Izvestııa» gazetine jarııalanǵan maqalasynda jazdy.
«Qazir Reseıdiń oqý oryndarynda Qazaqstannan barǵan 60 myńǵa jýyq stýdent bilim alyp júr. Astanada Máskeý memlekettik halyqaralyq qatynastar ınstıtýtynyń fılıalyn, al Ombyda ál-Farabı atyndaǵy Qazaq ulttyq ýnıversıtetiniń ókildigin ashý josparymyzda bar. Elimizde 3500-den astam mektep Pýshkın tilinde bilim beredi, telearnalar men radıostantsııalar habar taratady, gazetter men jýrnaldar shyǵady. Barlyq derlik óńirde kórermenniń kózaıymy bolyp júrgen orys drama teatrlary bar. Bizdiń el Táýelsiz memleketter dostastyǵy aıasynda Orys tiline qatysty halyqaralyq uıym qurý týraly bastama kóterdi», — dedi Memleket basshysy.
Prezıdenttiń atap ótýinshe, uıym orys tilin qoldaý jáne ony nasıhattaý úshin TMD elderi arasyndaǵy baılanysty damytý máselesimen aınalysatyn bolady.
«Bul qadam halyqtarymyzdyń arasyndaǵy dostyqty, tatý kórshilikti, etnosaralyq kelisimdi, ózara túsinistik pen senimdi nyǵaıta túsedi dep senemin», — dedi Qasym-Jomart Toqaev.
Memleket basshysy Qazaqstan men Reseı kóp polıarly álem, beıbit dıalog, barlyq memleketterdiń egemendigin qurmetteý syndy ıdeıalardy dáriptep, halyqaralyq arenada ózara tabysty qarym-qatynas jasap otyrǵanyna nazar aýdartady.
«Eki eldiń jahandyq jáne aımaqtyq deńgeıdegi kóptegen máselege qatysty ustanymy úndes. Táýelsiz memleketter dostastyǵy, Ujymdyq qaýipsizdik týraly shart uıymy, Shanhaı yntymaqtastyq uıymy, Azııadaǵy ózara is-qımyl jáne senim sharalary jónindegi keńes jáne basqa da ıntegratsııalyq birlestikter aıasyndaǵy tyǵyz yqpaldastyq — sonyń aıqyn dáleli. Bıyl shilde aıynda Astanada Shanhaı yntymaqtastyq uıymynyń sammıti ótti. Onda „Ádil álem, kelisim jáne damý jolyndaǵy jahandyq birlik“ týraly deklaratsııa qabyldandy. Bul qujat uıymnyń Eýrazııada jańa, birtutas jáne bólinbes qaýipsizdik arhıtektýrasyn qurýǵa yqpal ete alatynyn aıǵaqtaıdy. Qazan aıynda Máskeý qalasynda TMD-ǵa múshe elderdiń memleket basshylary keńesi otyrysynyń ótkizilýi bıylǵy mańyzdy oqıǵanyń biri boldy. Basqosýda taraptar ózara tıimdi ári jan-jaqty yqpaldastyqty damytýǵa múddeli ekenin atap kórsetti», — dedi Prezıdent.
Eske sala keteıik, buǵan deıin Prezıdenttiń shaqyrýymen Vladımır Pýtın Qazaqstanǵa memlekettik saparmen keletinin jazǵan bolatynbyz.
