Omby zaýytyna shabýyldan keıin Pavlodar MÓZ qalaı qorǵalady
ASTANA. KAZINFORM — Energetıka mınıstrligi Reseıdegi Omby munaı óńdeý zaýytyna jasalǵan shabýyldardyń Pavlodar munaı óńdeý zaýytynyń qaýipsizdigine áser etpeıtinin málimdedi.
Vedomstvonyń málimetinshe, strategııalyq nysandar turaqty baqylaýda, munaı ónimderin jetkizýdiń balamaly baǵyttary da qarastyrylǵan.
— Jýyrda Reseıdiń Omby munaı óńdeý zaýytyna jasalǵan shabýyldardan keıin shekaralas jatqan Pavlodar munaı óńdeý zaýytyndaǵy qaýipsizdik sharalary kúsheıtile me? Búginde bul strategııalyq nysan qanshalyqty qorǵalǵan?, — dep suraq qoıdy tilshiler Úkimette ótken brıfıngte.
Óz jaýabynda vıtse-mınıstr Qaıyrhan Tutqyshbaev elimizdegi energetıkalyq tizbekke kiretin barlyq nysan, ıaǵnı munaı óńdeý zaýyttary men jylý elektr ortalyqtary strategııalyq nysandar sanalatynyn atap ótti.
— Sondyqtan olardyń barlyǵy turaqty kúzetpen qamtamasyz etilgen. Tıisti qaýipsizdik sharalary áldeqashan qabyldanǵan. Bul tek qazirgi jaǵdaıǵa baılanysty emes. Mundaı nysandar qaýipsizdik turǵysynan árdaıym erekshe baqylaýda bolady, — dedi Qaıyrhan Tutqyshbaev.
Sonymen birge, shabýyl saldarynan Reseıden keletin munaı ónimderi azaısa, Qazaqstan tapshylyqtyń ornyn qalaı toltyrady degen saýal qoıyldy.
— Munda naqtylaı ketý kerek: biz negizinen Reseıden dızel otyny men avıatsııalyq otyn satyp alyp keldik. Qazirgi ýaqytta elimizde qajetti teńgerim qalyptasqan. Oǵan qosa, biz munaı ónimderin jetkizýdiń balamaly baǵyttaryn damytý jumystaryn burynnan júrgizip kelemiz jáne bul jumys Energetıka mınıstrliginde jalǵasyp jatyr, — dedi vıtse-mınıstr.
Buǵan deıin Q. Tutqyshbaev Qazaqstan Reseıge gýmanıtarlyq kómek jiberedi degen aqparatty teristegen edi.
Qazirgi tańda kórshi elderge janar-jaǵarmaı jetkizý máselesi kún tártibinde turǵan joq.
