Omartashy óz denesin jarty mıllıon aramen japty
ASTANA. QazAqparat - Qytaıdyń ońtústik-batysyndaǵy Chýntsın qalasynyń turǵyny ózi óndiretin baldy jarnamalaýdyń erekshe ádisin tapty. Ol salmaǵy 45 kelini quraıtyn tiri aralardy denesine jaýyp, kópshiliktiń nazaryn ózine aýdardy.
34 jastaǵy omartashy denesine «qonǵan» 460 myń aramen 14 mınýt boıy turdy. Aramen kún saıyn jumys istep júrgenine qaramastan, ol osy «erlikti» jasaımyn dep qorqyp qalǵan, dep jazady Ýtro rý.
Omartashy qaýipsizdik sharasy retinde basyna polıetılendi paketti kıip aldy. Ara shaǵa qalǵan jaǵdaıda onymen betin jabýdy kózdegen eken.
«Qanshalyqty tolqyǵanymdy bilseńizder ǵoı. Biraq soǵan qaramastan ózimniń balymdy jarnalamalap, satýym kerek», - deıdi omartashy She Pın.
Onyń aıtýynsha, baldy jarnamalaýdyń atalǵan túri álemde on jyldan astam ýaqyt boıy qoldanylyp keledi.
Sondaı-aq ol buǵan deıin denesin aramen jaýyp, Gınnes rekordtar kitabyna engen Úndistan turǵyny qalyptastyrǵan rekordty jańarta almady. Úndilik omartashy denesine 61 keli arany qondyryp, úzdik atanǵan bolatyn, dep jazady agenttik.
